Razaun 5 Partidu Democrata Cristão Hili Ramos Horta

by -263 views
Kandidatu Prezidente republika periodu 2022-2027, Jose Ramos Horta foto hamutuk ho lider Partidu Democrata Cristaun (PDC), hafoin deklarasaun apoiu ba kandidatu numeru sorteiu 14 ne'e, Foto TP/Jeremias Soares

(Reportajen Jeremias Soares/Editor Mateus da Cruz)

DILI Timor Post – Estrutura Lideransa Partidu Democrata Cristão (PDC) no membru sira ofisialmente deklara fó apoiu ba Premiadu Nobel da Paz, José Ramos Horta hodi sai  Prezidente Repúblika ba períodu 2022-2027.

Prezidente PDC Interinu Domingos da Costa,  akompaña hosi  Sekjer PDC, Francisco de Araújo deklara, desizaun apoiu ne’e sira deside tuir reuniaun Konsellu Diretiva Nasionál (KDN) iha loron 19 fuan Fevereiru 2022 hodi apoia kandidatu Ramos Horta.

“Partidu PDC ho estrutura másimu hosi nivel nasionál to’o suku deklara apoia totálmente kandidatu Dr. José Ramos Horta,” dehan Domingos liu hosi nia diskursu ne’ebé hala’o iha Edifísiu PDC, Bairru-Pite Dili, Domingu (27/02).

Estrutura PDC observa katak, iha fatór lima ne’ebé kesi metin sira hodi apoia Ramos Horta, primeiru, Horta iha kapasidade diplomasia nivel altu no koñesidu iha mundu internasionál iha prosesu luta ba ukun rasik aan no to agora mundu sei fiar nafatin.

Segundu, Horta nu’udar premiadu Nobel da Paz, terseiru, Horta iha esperiénsia hanesan eis Prezidente Repúblika períodu 2007- 2012 ne’ebé konsege hamutuk ho Maun Boot Kay Rala Xanana Gusmão rezolve krize polítika militár iha tinan 2006/2007 no hadi’a hikas ekonomia Timor-Leste.

Razaun kuatru, Horta nu’udar Lider Mundial hodi okupa pozisaun nu’udar Membru Konsellu Seguransa iha Organizasaun Nasões Unidas (ONU) no Reprezentante Espesiál ONU ba iha Guinea-Bissau. No ikus liu tanba Horta bele halo repozisaun Konstituisaun RDTL no hadi’a imajen TL iha mundu tomak no kria kooperasaun di’ak ho nasaun membru ASEAN.

Bazeia ba razaun hirak ne’e, estrutura PDC la dúvida no apela ona militante sira atu ezerse sira nia direitu hodi vota ba kandidatu José Ramos Horta iha loron 19 de Marsu 2022.

Horta Hato’o Agradese

Iha fatin hanesan, Premiadu Nobel da Paz, José Ramos Horta hato’o hato’o agradese ba apoiu ne’e no hein lideransa partidu no membru sira hodi vota iha loron 19 de Marsu 2022 iha númeru sorteiu 14 ho fotografia Horta no Xanana nian.

“Imi ba vota labele sala, haree bulletin votus ne’e hahú hosi okos, ha’u nia númeru 14,” dehan Horta.

Ramos Horta konsidera númeru sorteiu 14 ne’e, nu’udar númeru viasakra ba istória Na’i Jesus Kristu nian, tanba númeru ne’e maka refleta ba Na’i Jesus Kristu nia istória nia mate no númeru resurreisaun ba sarani Katólika hodi hamutuk hadi’a fila fali imajen Timor-Leste.

“Númeru 14 ne’e, nu’udar númeru viasakra ba istória Na’i Jesus Kristu nian, tanba númeru ne’e maka refleta ba Na’i Jesus Kristu nia istória nia mate no númeru resurreisaun ba sarani Katólika hodi hamutuk hadi’a fila fali imajen nasaun Timor-Leste ninia demokrasia  no númeru sorteiu ka númeru  ida di’ak ba ita boot sira partidu kristaun tenke badinas reza no tun ba aldeia eduka ita nia votante vota ba númeru 14,” dehan Horta.

Horta dehan, Timor-Leste presiza hametin fila fali estadu direitu demokrátiku ho loloos no hadi’a hikas ekonomia Timor-Leste labele monu ba beibeik no hasa’e kresimentu ekonomia hodi redús kria no buka rezolve problema juventude no estudante sira iha Timor-Leste. (Lee notisia seluk iha jornal Timor Post/asesu you tube Timor Post)

No More Posts Available.

No more pages to load.