Rajaun Governu Selu Tarde Saláriu ba Funsionáriu hamutuk 144

by -82 views

Timor Post (05/02/2021)- Diretora Jerál Tezouru Ministériu Finansas, Regina de Jesus de Sousa, hatete, hosi total funsionáriu 43.351 hela na’in 144 mak saláriu seidauk tama.

Funsionáriu hirak ne’e hosi Imprensa Nasionál Timor-Leste (I.P), na’in 46), tanba submisaun pedidu hosi Imprensa Nasionál rasik loke sira nia konta bankária rasik tarde, tanba  hanesan ajensia autónomu foun ho autonomia administrativa finanseira rasik.

Konsellu Imprensa (KI) funsionáriu (30), tanba kontratu mate iha loron 31 Dezembru 2020 to’o loron 12 Janeiru 2021 sistema Payroll seidauk simu kontratu foun hosi (KI), no mós notifikasaun hosi komisaun funsaun publika atu bele prosesa saláriu ba na’in 30 ne’e.

MAPKOMS (11) destaka iha (PDHJ), maibé laiha konfirmasaun hosi (MAPKOMS), atu selu sira nia saláriu hosi orsamentu (MAPKOMS).

Regina dehan Ministériu Finansas komunika ona ba MAPKOMS no PDHJ atu fó konfirmasaun fonte orsamentu hodi selu funsionáriu 11 refere, maibé to’o ohin loron Ministériu Finansas sei hein hela resposta hosi instituisaun rua ne’e.

Regina adianta iha mós funsionáriu hosi SEFOPE hamutuk (57), mak nia saláriu tarde tanba iha problema ho mapeamentu ba kódigu orsamentál foun, ne’e duni iha hela prosesu nia laran atu finaliza ba banku, ohin loron ka tarde liu segunda feira semana oin.

Alende ne’e ba profisional saúde sira nia saláriu fulan Janeiru selu hotu ona, inklui mós retroativu oras extra, turnu.

Diretora Tezouru MF nian dehan  duni karik pesoál saúde balun reklama seidauk simu husu favor atu kontaktu unidade rekursu umanu no ida-idak nia banku.

Kona-ba saláriu désimu terseiru ba (PNTL), selu hotu ona, no esplika saláriu désimu terseiru tuir dekretu lei númeru 63/2020, 10 Dezembru 2020, selu de’it saláriu baze, esklui subsídiu alimentasaun no transporte.

Esplika kona-ba  UNTL nu’udar ajénsia autónomu iha autonomia rasik atu realiza pagamentu direita ba banku, ne’e duni ba dosente konvidadu no dosente part-time ne’ebé seidauk simu sira nia saláriu hosi fulan Outubru 2020 to’o Janeiru 2021, UNTL rasik mak sei responde ba sira nia problema internal.

Apela diretora ba publiku katak, mudansa sira iha baze de dadus iha inisia kada tinan, normal tanba tenke atualiza tuir orsamentu aprovadu iha Parlamentu  Nasionál.

Alende ne’e ba funsionáriu kontratadu, Sira mós husu ba ministériu ida-idak atu esplika ba sira nia funsionáriu kontratadu katak, bainhira sira nia Kontratu remata iha loron 31 Dezembru 2020. Kada instituisaun mak iha responsabilidade atu renova ka lae kontratu ba funsionáriu kontratadu sira. Sistema Payroll Ministériu Finansas sei rejeita automatikamente kontratu ne’ebé mak mate.

 

Jornalista            : Jaime Pires

Editor                    : Mariano Martins

No More Posts Available.

No more pages to load.