RAEOA-UNDP Kria Website Promove Turizmu

by -368 views
Prezidente Autoridade Rejiaun Administrativu Espesiál Oekusi Ambenu (RAEOA), Arsénio Paixão Bano

(Reportajen Sergio De João Batista Lelan/Asistente Editor Hermenegildo da Costa Tilman)

Dili (Timor Post)—Prezidente Autoridade Rejiaun Administrativu Espesiál Oekusi Ambenu (RAEOA), Arsénio Paixão Bano, hamutuk ho United Nation Development Program (UNDP), realiza promosaun website kona-ba promove turizmu iha Oekusi Ambenu.

“Ohin ne’e Oekusi promove website ida hodi promove turizmu iha Oekusi, liu husi website ne’e atu hatudu de’it katak iha Timor-Leste ne’e iha sidade ida moos tebes iha Oekusi”, nia dehan ba jornalista sira iha salaun Resistencia Museum UNTL, Liceu, Sesta (06/05).

Nia haktuir, sidade kiik ida ne’e bele oferese ba se deit, ba sei deit mak hakarak vizita turizmu Oekusi bele asesu liu husi link website ne’e.

“Ba Timor oan hotu ne’ebe mak hakarak vizita Oekusi bele asesu informasaun hotu iha Website ,ita halo ona  husi konsolidasaun ho komunidade sira hodi halo promosaun ba produtu lokál Oekusi nian,  bainhira ema hakarak ba vizita Oekusi hakarak han modo entaun bele hola modo”, nia hatutan.

Nia subliña, iha fatin turizmu barak iha website kompletu iha laran, iha Oekusi laran rasik iha Lifau Tasi, Fatusuba, Santo Antonio, Santa Relique, fonte sagrada, Poto Oesilu, no seluk-seluk tan, iha mós turizmu religious, primadona  mak Ponte Noefefan.

Iha fatin hanesan, Vise Ministra Turizmu Inácia Teixeira, haktuir, atu RAEOA avansa ba oin entaun munisípiu seluk tenke komprende situasaun tanba RAEOA ne’e nia estatutu ketak, depois nia estatutu espesiál ne’e nia iha podér atu dezenvolve buat sira ne’e liga ho ekonomia,

“Ha’u husu nafatin ba ita hotu hodi nafatin koopera malu hodi hadi’a turizmu rai laran diak liu tan, nafatin ita hamutuk hodi buka meius atu promove turizmu nian liga ba munisípiu nian”, nia hakotu. (Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.