PUDD Apresia Esforsu Governu Kombate COVID-19

husi -440 views

Timor Post (28/01/2021)—Bankada Parlamentár Partidu Unidade Dezenvolvimentu Demokrátiku (PUDD) apresia ho esforsu Governu nian iha ámbitu kombate no mitiga pandemia COVID-19 iha Timor-Leste mezmu ho limitasaun barak.

“Lori Bankada PUDD nia naran hakarak hato’o ba ami nia apresiasaun ba esforsu tomak ne’ebé mak Governu halo durante ne’e, ne’ebé mak ami hare katak esforsu másimu, mezmu ho limitasaun barak, maibé Governu konsege bele fó prestasaun di’ak ba ita nia Povu no nasaun atu ita hotu bele sees husi moras COVID”. Xefe Bankada PUDD, Antonio Benevides, deklara liuhusi plenária, iha ámbitu debate estensaun EE da-10, kuarta (27/01).

Antonio hatutan, Bankada PUDD mós apresia ba serbisu ne’ebé mak PNTL-F-FDTL halo, mezmu ho ekipamentu ne’ebé mak la sufisiente, maibé sira kontinua dezempeña sira nia serbisu ho professional iha fronteira.

“Husu ba Ministériu kompetente atu tau atensaun ba ita nia F-FDTL no PNTL sira iha fronteira ba ekipamentu ne’ebé mak sira presiza atu hala’o sira nia serbisu ho di’ak liu”, Antonio hatutan.

Alende ne’e Bankada PUDD apresia mós ba Ministra Saúde ho nia ekipa tomak ne’ebé mak fó atendimentu di’ak ba maluk sira ne’ebé tama iha fatin kuarentena no mós sira ne’ebé mak moras iha izolamentu.

“Ba ita nia médiku sira no serbisu professional sira hotu, maiske dala-ruma sira mós simu insultu, maibé ema sira insultu ne’e mós tanba la’ós ho intensaun hakarak insulta de’it, maibé dala-ruma informasaun no sira nia komprensaun ba situasaun mak la to. Ne’ebé husu ba professional saúde sira ne’ebé mak atende atu bele perdua no komprende sira nia situasaun”, Antonio dehan.

Antonio haktuir Partidu PUDD hetan karta husi Ministra Saúde atu lideransa PUDD bele fó mós mensajen ba simpatizante no militante sira hotu kona-ba regras ne’ebé mak ita hotu presiza halo tuir.

“Lori Bankada PUDD nia naran atu husu ba povu tomak no ba ita hotu, katak regras ne’ebé mak Governu fó sai ita hotu tenke kumpre. Se ita kumpre buat hotu sei bele la’o di’ak. Husu ba povu tomak atu kontinua reza tuir nia ida-idak nia fiar atu moras ida ne’e labele oho ita”, Antonio. (Jornalista Julio Salinas, Editor Mariano Martins)