PSDN: Korenti Tasi Mak Dulas Joven Na’in-Neen

by -1.931 views
Imajen ne'e hatudu komunidade sira halo evakuasaun ba vitima sira. Foto Espesial

Jornalista Caetano Guterres / Editór Noémio Falcão

Baukau (Timor Post)—“Sira ba haris iha tasi Binagua mak mate tanba korenti tasi mak dulas, lori tama sira na’in-neen ba tasi laran, na’in-lima mate kedas iha tasi laran, na’in-ida mak konsege salva”.

Diretór Protesaun Sivíl no Dezastre Naturál (PSDN) Munisípiu Baukau, Nelson Nunes haktuir, hafoin komunidade sira halo evakuasaun, nia parte servisu hamutuk ho Dirasaun Solidariedade Sosial (DSS) Baukau ho família prepara ona kaixaun ba matebian na’in-lima.

Matebian sira kompostu husi mane na’in-rua no feto na’in-tolu. Sira hotu família uma lisan-ida de’it, husi Suku Guruka, Postu Administrativu Kelikai, Munisípiu Bauaku.

Matebian sira ida-idak ho naran, Sonia Gaio, Benina Gaio, Lindalva Gaio, Andy Gaio, Quintiliano Gaio.

“Simu informasaun husi autoridade seguransa katak ita nia sidadaun na’in-neen husi suku Gurusa ba haris tasi iha area Binagua nian no mout iha tasi laran, nain lima mate no nain ida konsege salva,” Diretór Nelson hatutan.

Xefe Sentru Saúde Laga, Jerónimo da Costa Ximenes hatete, vítima ne’ebé konsege salva evakua kedas ba sentru saúde nia parte halo tiha atendementu imidiata no kontinua transporta ba ospital referál Baukau.

Matebian na’in-lima hamutuk ho família ba hariis tasi hodi festeza simu tinan foun 2022 iha Binagua-Postu Administrativu Laga, Munisípiu Baukau, iha loron Domingu 02/01/2022.

No More Posts Available.

No more pages to load.