Profesór 3.153 Foin 1.489 Maka Vasina, Eskola 98 Seidauk Reativa

by -29 views
Ministru MEJD, Armindo Maia akompana ho Vice Ministru MEJD, Antonio Guterres hamutuk ho dirijente hala'o konferensia Imprensa hodi desidi reativa fila fali eskola 99 iha Kapital Dili, iha salaun VIP MEJD Vila Verde. (Foto TP/Jose Mauno)

(Reportajen Jose Mauno/Editor Suzana Cardoso)

DILI (Timor Post) – Atu evita Covid-19 nia daet, hamutuk professor 1.489 ho voluntariamente simu ona vasina husi total profesór iha Kapital Dili, na’in 3.153. Maibé na’in 1.655 maka seidauk simu vasina hodi afeita ba eskola 98 maka seidauk bele reativa.

“Ministériu Edukasaun Juventude no Desportu (MEJD) hasai ona sirkulár ida, liu-liu ba profesór sira, katak hotu-hotu tenke simu vasina Covid-19 nian. Liu-liu iha Dili, laiha razaun para labele simu vasina. Ba sira ne’ebé iha munisipiu, ha’u sei tolera tanba limitasaun oin-oin.”

Lia hirak ne’e esplika husi Ministru MEJD, Armindo Maia liu husi konferénsia imprensa iha salaun VIP MEJD Vila Verde iha semana kotuk.

Ministru Armindo hateten, eskola iha Munisípiu Dili hamutuk 197 ne’ebé kompostu husi eskola pre-eskolár 60. Ensinu báziku 106. Ensinu sekundáriu jerál 22. No eskola tékniku vokasionál 9. Maibé eskola 99 maka sei reativa nia prosesu aprendizajen prezensial. Ba eskola 98 seidauk hetan autorizasaun hodi reativa.

Eskola 99 ne’ebé desidi ona para reativa prosesu aprendizajen prezensial tuir Armindo, eskola pre-eskolár 41, ensinu báziku 36, ensinu sekundáriu jerál 19 no eskola tékniku vokasionál 6. Tanba eskola hirak ne’e prepara ona material ijiene no profesór sira vasina atinji ona 70%.

Maibé eskola 98 ne’ebé kompostu husi; eskola pre-eskolár 19. Ensinu báziku 70. Ensinu sekundáriu jerál 6. No tékniku vokasionál 3, maka seidauk priense kriteria Organizasaun Mundial Saúde (OMS) nian hodi hetan autorizasaun reativa nian.

Entretantu total estudante iha Dili hamutuk 54.743. Kompostu husi pre-eskolár 6.096, ensinu báziku 19.993, ensinu sekundáriu jerál 24.589 no tékniku vokasionál 4.065. Alende ne’e, total profesór iha Dili hamutuk 3.153. Husi númeru ne’e; profesór 1.489 simu ona vasina no Profesór na’in 1.655 mak seidauk. Katak, foin profesór na’in 47% maka vasina. Na’in 53% seidauk.

Tanba Kapital Dili no Munisipiu Baukau katak Ministru Armindo, iha semana kotuk nia insidénsia ka taxa infesaun Covid-19 la-aumenta numeru ne’ebé signifikativu, maka MEJD foti desizaun reativa fila fali prosesu aprendizajen prezensial.

Alende ne’e tenik Ministru Armindo hodi hateten, “Taxa vasina mós aumenta maka’as iha munisipiu rua ne’e. Liu-liu profesór ho funsionáriu sira nia numeru vasinasaun atinji pelu menus 70%. Hau hanoin ida ne’e mak atinji para reativa.”

Katak Governante ne’e, ba sira ne’ebé mak seidauk atinji 70% taxa vasinasaun presiza halo lai preparasaun. Profesór no funsionáriu sira hotu-hotu tenke ba tuir vasina, pelu menus dose ida, mak foin autoriza para reativa eskola.

Maske nune’e Ministru MEJD ne’e nafatin husu ba eskola 99 ne’ebé reativa ona hodi nafatin kumpri protokolu OMS nian. Hanesan; uza máskara, halo distánsia sosiál no eskola tenke prepara bee hodi hotu-hotu tenke fase liman bei-beik.

“Ami husi MEJD iha nivel sentrál no munisípiu sei hala’o fiskalizasaun ba eskola sira ne’e atu hare sira kumpre ona regra OMS nian ka lae. Ba sira ne’ebé la kumpre, sei foti medida suspende no fó sansaun rigorozu,” dehan Ministru MEJD ne’e.(Lee notisia seluk iha Jornál Timor Post)

No More Posts Available.

No more pages to load.