Produtu Lokál iha Merkadu Taibessi La Folin

by -98 views
Foto Espesial

DILI (Timor Post)—Implementasaun konfinamentu obrigatóriu (KO) iha capital Dili relasiona ho númeru kazu variante delta ne’ebe sa’e, fo impaktu boot ba negosiante sira nia produtu ne’ebe fa’an iha merkadu Taibesi, nune’e mós iha dalan ninin sira tanba ladun iha rendimentu.

Negosiante José dos Santos hatete, ninia produtu lokal ne’ebe fa’an iha merkadu ladun folin diak kompara molok aplika konfinamentu obrigatóriu.

“Modo tahan neebé ami faan daudauk nee, ami sosa haknauk hosi maluk sira neebé lori hosi Hera mai, sira lori mai fa’an ba ami maibé sira mós ba sosa tutan, pior liu mak ami hirak sosa fa’an fila-fali, dala ruma ema la mai sosa ami nia modo ho tomate sira namlaek no dodok, ami soe estraga,” José hatoo ba Timor Post iha merkadu Taibesi, Domingu (29/08).

Aleinde ne’e, nia kestiona kona-ba folin produtu lokál hanesan modo tahan no tomate ne’ebé fa’an ladún folin iha merkadu.

“Tomate ami sosa hosi maluk sira hosi Baukau mai Dili, balde boot (kunci mas) nakonu ho folin $25, maibé agora fa’an ho folin $5 hatun ba $4, nune’e mós raga boot ida nakonu faan ho folin $60, maibé agora tuun ba $15, enkuantu balde ki’ik nakonu sentavu25, balde boot natoon nia folin sentavu 75,” nia katak.

Nia haktuir, modo neebé sira fa’an depende ba sorte hosi ema sosa, loron ida dala ruma ema sosa to’o $10 de’it, dala ruma la to’o tan.

Nune’e mós Gilbrta da Costa, hatete situasaun ida agora mais pior, kompara ho antes ne’sei di’ak.

“Ita hotu ta’uk ho moras Covid-19, maibé ami negosiante sira la hatene Covid-19 ne’e mai hosi ne’ebé. Tanba saida mak Governu la taka de’it fronteira, nune’e limita ema tama-sai, iha ita nia rai laran movimentu livre, atu nune’e ami negosianete bele buka netik moris,” nia kestiona.

Tuir nia, governu labele hapara movimentu transporte públiku iha rai laran, hapara de’it mak iha fronteira no aeroportu.

“Ita boot sira haree rasik ami nia moris mak iha merkadu, agora governu taka daka dalan ami atu hetan osan hosi ne’ebé, ami lori saida atu selu oan sira nia eskola, gradese eskola laiha, ami nia oan sira la eskola, se ami nia oan sira ba eskola ami lori saida atu selu, ami fan modo deit la folin,” nia suspira.

Portantu, iha observasaun ne’ebé Timor Post halo iha terenu, nota katak negosiante iha Merkadu Taibesi kuaze  halerik tanba modo la folin, maioria fa’an modo lori la’o iha merkadu laran labarik ho idade 10 to’o 15 inklui joven, ferik no katuas .(res)

No More Posts Available.

No more pages to load.