Produtu Lokal Atu Lori ba Expo Dubai Budu hela iha Dili, ANED-TL husu Sasan Nain ba Foti Fila-Fali

by -986 views
Foto Espesial

Dili (Timor Post)—Produtu lokal ne’ebé timoroan sira prepara no entrega ba komisaun atu lori ba halo promosaun iha Expozisaun Internasionál Dubai, to’o agora sei rai hela iha Sede ANED-TL, Tasi Ibun, Eis Edefísiu CPLP, Praia dos Coqueros, Dili tanba rajaun seidauk klaru.

Sasan hirak ne’e maioria artesanato mak hanesan Kohe, Tais, Bua ho Malus Fatin, Lafatik, Kakehe no seluk tan.

Informasaun ne’ebé Timor Post assesu haktuir, Autoridade Nasionál Expo Dubai-Timor Leste (ANED-TL) halo ona kontaktu ho produtu nain sira atu ba foti fila-fali sasan, maibé seidauk realiza tanba bainhira iha sorumutu dahuluk ne’ebé hala’o iha loron 13/01/2022, mosu protesta maka’as husi produtu nain sira hasoru ANED-TL tanba konsidera laiha responsabilidade.

“Ami hanoin sasan ne’ebé ami prepara lori hotu ona ba Dubai afinál to’o agora sei iha hela Dili,” sasan nain ida ne’ebé lakohi temi naran ba Timor Post.

Nia hatete, produtu hirak ne’ebé prepara gasta tempu no osan ho esperasa katak bele reprejenta Timor Leste nia naran ba halo promosaun hodi atrai vizitante sira bele hola i dada turista no investor sira nia atensaun, maibé afinál sai oin seluk fali.

“Sira dehan ró ka kontentor mak laiha, maibé osan barak povu nian ne’ebé parlamentu aprova tiha ona ne’e hodi gasta ba prepara fasilidade sira ne’e,” fonte ne’e lamenta.

Sasan hirak la konsege lori ba Dubai prepara husi emprezária timoroan sira ne’ebé hamahan iha Associação Empresarial das Mulheres Timor-Leste (AEMTL), grupu feto no kbiit laek, faluk no komunidade privadu sira.

Timor Post konfirma problema ne’e ba Koordenadór Programa Expozisaun Dubai, Arif Abdullah Sagran, maibé resposta katak la’ós nia responsabilidade.

“Ne’e konfirma ba Sr. Manuel Vong. Ha’u iha Dubai la hetene saida mak akonse iha Timor,” Koordenadór Programa Expozisaun Dubai, Arif Abdullah Sagran subliña ba Timor Post via chating Facebook, Domingu (16/01/2022).

To’o notísia ne’e públika, Jornalista Timor Post seidauk hetan konfirmasaun husi Autoridade Nasionál Expo Dubai nian liuliu ne’ebé responsavel iha Dili.

Entretantu antes ne’e, Koordenador Jerál Autoridade Nasionál Expo Dubai, Manuel Vong subliña, Timor Leste nia partisipasaun iha Expo Dubai lori produtu hamutuk 50 resin hodi aprejenta iha expozisaun no ba komersializa hamutuk iha produtu 100 resin ne’ebé kompostu husi produtu agríkola, artezenatu, mineral no produtu tais.

Orsamentu ba atividade preparasaun Timor Leste iha Expo Dubai husi Orsamentu Jerál Estadu 2021 hamutuk millaun $1 resin (30%) no millaun $2 resin (70%) apoiu husi rai liur liuliu Emiradus Árabes Unidus.

Relasiona ho objetivu Timor Leste nia partisipasaun iha Expo Dubai, molok ekipa husi Timor Leste aranka ba Dubai, Primeiru Ministru Taur Matan Ruak mos subliña, Timor-Leste nasaun ki’ik, nasaun barak iha Osidental, hanesan Europa, Áfrika no Mediu Oriente la hatene Timor hela iha ne’ebé, tanba ne’e ho momentu sira hanesan ne’e (Expo Dubai) bele ajuda Timor-Leste promove nia identidade, nasionalidade no poténsia sira ne’ebé Timor-Leste iha.

Expo Dubai iha Uniaun Emiradus Árabe, loloos realiza iha tinan 2020, maibé tanba pandemia COVID-19 adia fali foin hahú iha loron 1 fulan Outubru 2021 no sei remata iha loron 31 fulan marsu 2022. (cao)

No More Posts Available.

No more pages to load.