Problema Boot iha Edukasaun: Professor Kontratadu no Kazuál Barak Liu Permanente

by -106 views

Timor Post (10/12/2020)—Fiskalizasaun husi reprezentante povu iha Uma Fukun Parlamentu Nasionál (PN) ba eskola sira hotu iha territóriu, rejista númeru professor kontratadu no kazual barak liu fali professor permanente sira.

Nune’e, iha debate Orsamentu Jerál Estadu (OJE) ba tinan 2021, Xefe Bankada Frente-Mudansa, Deputada Isabel Ximenes, levanta kestaun ne’e hodi husu ba Ministru Edukasaun Juventude no Desportu (MEJD), Armindo Maia toma atensaun ho sériu.

Isabel haktuir, bainhira komisaun G halo audiénsia ho Komisaun Funsaun Publika, hatete katak ministériu bele halo nia despaxu mesak ne’ebé mak fó kompeténsia para hodi bele solusiona problema ne’e.

“Ho ida ne’e mak ami husu ba señor Ministru, karik iha ona hanoin ruma ne’ebé mak ministériu foti atu haree ba kestaun ida ne’e, tanba maioria iha eskola sira ida rua de’it mak permanente, maibé restu ne’e kontratadu hotu,”  Isabel levanta kestaun ne’e iha ámbitu debate OJE tinan 2021 faze espesialidade, Kinta (10/12/2020).

Deputadu Bankada PLP, Franscisco Vasconcelos, ne’ebé hanesan mós membru komisaun G, sekunda katak problema profesór kontratadu ne’e deputadu sira sempre levanta beibeik ona, maibé to’o agora seidauk iha solusaun.

“Propofesor kontratadu kuatru mill ne’e kuaze ami foti dala-barak  ona, karta mai iha ami nia meza mós barak, hosi eskola hothotu, tanba ne’e husu Ministériu Edukasaun tau matan ba ida ne’e”. Vasconcelos rekomenda.

Deputadu Bankada Demokratiku no Eis Ministru Edukasaun,  António da Conceição “Kalohan” hatete  importante tebes atu resolve problema profesores kontratadu sira nian.

“Ita tenke rezolve problema profesores kontratadu, para ita fó tiha estatutu ida fiksu ba sira, tanba sira barak ne’e serbisu iha area remotas,” Eis Ministru Edukasaun ne’e dehan.

Hatán ba preokupasaun ne’e, Ministru Edukasaun Juventude no Desportu, Armindo Maia, subliña, númeru profesores kontratadu ne’ebé mak iha,  hosi nasionál liu rihun lima, ne’ebé mak mai hosi 2013 liuhosi prosesu verifikasaun no re-verifikasaun dadus.

“Ne’e naha todan ne’ebé mak ami simu, ami tenke hanoin solusaun ba kestaun sira ne’e. So -ke númeru ne’e barak implikasaun ne’ebé boot kuandu sira atu sai funsionáriu permanente, ne’ebé ami tenke konsulta ho Funsaun Públika ho Ministériu Finansas para foti desizaun. Ne’ebé 2021 ne’e ami sei buka solusaun ruma, se la konsege dala ida, entaun tenke halo fazeadamenente”. Armindo promete.

Jornalista: Julio Salinas Soares

Editór: Noémio Falcão

No More Posts Available.

No more pages to load.