Primeiru Ministru ho Membru Governu Sira ‘Evakua’ husi Palásiu ba Reuniaun KM iha CCD

by -99 views

DILI—Primeiru Ministru Taur Matan Ruak ho membru governu sira desidi sai husi palásiu hodi ba hala’o reuniaun Konsellu Ministru (KM) iha Sentru Konvensaun Dili (CCD sigla Portugués) ho rajaun iha fatin ne’eba maka luan atu membru governu sira bele tur dook malu tuir estandar ne’ebé Ministériu Saúde no Organizasaun Mundiál Saúde (OMS) aplika kona-ba distánsia sosiál.

Medida ne’e hola tiha ona iha loron Segunda (23/03/2020) bainhira konsellu ministru extraordinária iha CCD hodi halo aprovasaun ba kontiudu husi pedidu estadu emerjénsia ba atake virus corona iha territóriu liuliu iha munisípiu Dili.

Tuir observasaun Jornalista Timor Post  iha loron Kuarta (25/03/2020) iha CCD, membru governu sira tau hotu maskra hodi hala’o konsellu ministru iha fatin ne’eba.

Situasaun ne’e mosu bainhira pandemia virus corona (COVID-19) ne’ebé sai preokupasaun mundiál no iha Timor Leste rejista ona pasiente ida pozetivu ba moras aat ne’e.

Entretantu Prezidente Repúblika, Francisco Guterres Lú Olo, iha loron Tersa, 24 marsu 2020, hato’o ninian mensajen husu autorizasaun Parlamentu Nasionál atu deklara Estadu Emerjénsia bazeia ba pedidu husi Governu.

Prezidente Repúblika husu autorizasaun husi Parlamentu Nasionál hafoin membru husi Konsellu Estadu no Konsellu Superior Defeza no Seguransa, iha reuniaun ohin ho karáter urjénsia,  fó opiniaun favoravel katak presiza duni Xefe Estadu atu deklara Estadu Emerjénsia.  Prezidente Repúblika husu autorizasaun Parlamentu Nasionál, liuhusi mensajen ida. Se Parlamentu Nasionál aprova, Prezidente Repúblika sei deklara Estadu Emerjénsia liuhusi Dekretu Prezidensiál.

Prezidente Repúblika husu autorizasaun husi Parlamentu Nasionál nu’udar dalan atu prevene kalamidade públika ne’ebé bele mosu husi Coronavirus. Prezidente Repúblika nu’udar Xefe Estadu iha obrigasaun atu proteje ema hotu-hotu ne’ebé moris iha Timor-Leste atu moras ne’e la harahun Povu no País.

Ho Parlamentu Nasionál ninian autorizasaun, Prezidente Repúblika sei deklara Estadu Emerjénsia. Ho medida ne’e, Estadu tomak iha kbiit legál hamriik luta hasoru COVID-19.

Konsellu Ministru aprova Proposta Estadu Emerjénsia iha 16 marsu 2020. (cao)

No More Posts Available.

No more pages to load.