Prezidente Repúblika Sei Kondekora Veteranu Na’in-50 iha Baukau

by -180 views
Ministru Administrasaun Estatal (MAE) Miguel de Carvalho ho veteranu sira foto hamutuk ho Prezidente Repúblika Francisco Guterres Lú Olo. Foto Mídia PR

Dili (Timor Post)—Prezidente Repúblika Francisco Guterres Lú Olo sei fó sai dekretu lei kondekorasaun ba veteranu sira iha selebrasaun loron Proklamasaun Independénsia RDTL ne’ebé hala’o iha Munisípiu Baukau, 28  Novembru 2021.

Ministru Administrasaun Estatal (MAE) Miguel de Carvalho deskuti ona assuntu ne’e ho Xefe Estadu no informa ona kona-ba preparasaun sira ba serimónia komemorasaun ne’ebé sei gasta osan rihun atus haat resin Dolar Amerikanu.

Ministru Miguel informa, kondekorasaun sei fó ba veteranu hamutuk na’in-50.

“Ba veteranu sira, purtantu ita sei haree dekretu prezidensiál ne’ebé prezidente repúblika sei fó sai, Se-se mak kondekoradu, i sei hala’o iha serimónia isár de bandeira,” Ministru Miguél haktuir ba Jornalista sira hafoin reuniaun ho Prezidente Repúblika Francisco Guterres, iha Palásiu Prezidensiál, Bairro-Pité, Dili, Segunda (22/11/2021).

Atividade prinsipais sira ba selebrasaun loron istóriku ne’e mak hanesan desportu komunitáriu ne’ebé hala’o daudauk iha territóriu timor laran, feira no kondekorasaun ba veteranu sira.

Tuir ajenda, Prezidente Repúblika Francisco Guterres Lú Olo maka diriji serimónia hasa’e bandeira no iha parte lorokraik Prezidente Parlamentu Nasionál, Aniceto Guterres maka diriji serimónia hatun bandeira. (cao)

No More Posts Available.

No more pages to load.