Prezidente Repúblika Promulga Dekretu-Lei  Apoiu Estraordinários ba Insersaun iha Merkadu Traballu

by -93 views
Prezidente Repúblika Francisco Guterres Lú Olo

DILI (Timor Post)—Prezidente Repúblika, Francisco Guterres Lú Olo, promulga Dekretu-Lei kona-ba apoiu estraordinárius ba insersaun iha merkadu traballu hodi tulun traballadór sira ne’ebé sai dezempregu tanba impaktu sosiuekonómiku husi implementasaun medidas prevensaun no kombate pandemia Covid-19.

Komunikadu ba imprensa ne’ebé Timor Post asesu husi Palásiu Prezidénsial Nicolau Lobato, Díli, 27 agostu 2021, haktuir, implementasaun medidas prevensaun no kombate pandemia Covid lori impaktu ba atividade ekonómiku ne’ebé menus, númeru dezempregu aumenta no risku sai kiak. Situasaun ne’e hetok iha impaktu boot liután ho inundasaun ne’ebé akontese iha 4 abril 2021. Tanba ne’e Estadu halo aprovasaun ba medidas apoiu ba empregu liuhusi Lei númeru 8/2021, 3 maiu.

Liuhusi Programa “trabalho contra remuneração” iha ámbitu “Supporting Flood Response and Recovery Project” ho apoiu finanseiru hamutuk US $ 1.000.000 (miliaun ida dólares norte-amerikanu) jere husi Programa Nasoins Unidas ba Dezenvolvimentu (PNUD) no ho koordenasaun ho Sekretária Estadu Formasaun Profissional no Empregu (SEFOPE) sei benefisia traballadores besik 5000 iha 50 aldeias.

Programa ne’e sei lori impaktu liután liuhusi promove insersaun traballadór sira iha merkadu traballu no insentiva partisipasaun setor privadu hodi fó apoiu finanseirus ba empresa no traballadór sira.

Dekretu-Lei fó dalan ba Governu atu fó apoiu ba empregu liuhusi pagamentu ba empreza to’o 70 % husi kustu remunerasaun ba nia traballadór sira, livre husi dever atu selu kontribuisaun ba seguransa sosial no pagamentu ba súbsidiu estraordináriu dezempregu no promove manuntensaun postu traballu, kontratasaun traballadores no hala’o hikas filafali atividade ekonómika.

Apoiu finanseiru ba empregu sei selu ba fulan tolu nian  husi marsu to’o maiu 2021 ba traballadór sira ne’ebé integra iha programa “trabalho contra remuneração”. (*/cao)

No More Posts Available.

No more pages to load.