Prezidente PSHT: Membru ba Hasa’e Sintu iha Indonézia Ilegál

by -2.600 views
Imajen ne’e hatudu Polísia Repúblika Indonézia (POLRI) interoga hela membru sira ne’ebé kapturadu iha Atambua. Foto Espesiál

Jornalista Jaime Pires / Noémio Falcão

DILI (Timor Post)— Presidente Grupu Arte Marsiál Persaudaran Setia Hati Terate (PSHT) Timor-Leste, Baltazar Lemos la konsidera membru sira ne’ebé ba hasa’e sintu (sabuk) iha Atambua, Indonézia liuhusi dalan ilegál.

“Membru sira ne’ebé kontinua hakat ilegál hodi ba sae sintu iha Indonézia laiha karta koñesimentu ruma husi organizasaun,” Baltazar bba Jornalista sira hafoin ba presta deklarasaun iha Kuartel Jerál PNTL, Kaikoli, Tersa (10/08/2021), relasiona ho kapturasaun ba membru sira iha fronteira no iha Atambua loron hirak liu ba.

“Ami la fó karta mandatu para sira atu ba sa’e sintu iha Indonézia, sira ba ne’e pesoal, no ilegalmente, sein koñesimentu hosi ami,  nein govern, sira ba ne’e ilegál,” nia subliña.

Prezidente PSHT ne’e aumenta, lideransa organizasaun sempre kontrola membru sira, maibé bainhira desizaun governu nian hodi taka organizasaun tolu,  ho nune’e mak halo lideransa sira susar atu kontrola, tanba membru sira kontinua treinu subar, no la rona ona lideransa organizasaun sira.

“Governu la autoriza,  no organizasaun mós la autoriza,  maibé sira treinu subar iha “kama okos”,  ka iha ne’ebé de’it ha’u la hatene ida ne’e,  ida ne’e ha’u mos preokupa,” Baltazar salienta.

Tanba ne’e,  bainhira governu re-ativa hikas organizasaun PSHT mak sira kontrola membru sira ho didi’ak, nune’e labele mosu tan kazu hanesan.

Presidente PSHT ne’e haktuir,  uluk governu seidauk taka organizasaun tolu hanesan PSHT,  IKS no KORK,  aktividade sa’e sintu halo iha Timor,   maibé hafoin governu deside hodi taka  maka membru sira hakat ilegalmente ba Atambua hodi sa’e sintu.

Atu hakotu nia dehan,  tuir dadus ne’ebé mak nia hetan, membru hamutuk 371 mak sei iha Atambua hodi ba sa’e sintu. Lee notísia seluk iha Jornal Timor Post

No More Posts Available.

No more pages to load.