Prezidente Interinu Fitun Rekoñese Ema Na’in-500 Mak La Hatama Kartaun Eleitorál

by -48 views

Timor Post (13/01/2021)— Prezidente Interinu Partidu Fitun, Salvador Tilman, rekoñese iha dokumentu ne’ebé hatama ba Tribunál Rekursu iha ema na’in-500 mak halo de’it deklarasaun sein hatama kartaun eleitoral.

 “Fitun enfrenta faillansu iha kartaun eleitór, grupu eleitores 500 mak halo de’it deklarasaun tanba ida ne’e mak tribunál la simu,” Salvadór haktuir ba Timor Post, Kuarta (13/01).

Tilman dehan prosesu autentikasaun ba kartaun eleitorál iha Ministériu justisa  tenke tuir kartaun eleitorál ida-idak nian, asinatura tenke ema ida-idak nian.

 Prezidente interinu ne’e afirma partidu mós lakohi halo atividade ida sem iha baze legal. Impedimentu hosi tribunál rekursu nia dehan la signifika partidu  la eziste ona, maibé ida ne’e hodi obriga partidu  hadi’a rekizitu  tuir lei partidu polítika, lei númeru 13 haruka.

“Ita mós hein ida ne’e, tanba ita mós hakarak kuandu iha legal tiha lai mak halo atividade polítika, kuandu seidauk prienxe rekizitu maka hala’o uluk atividade polítika ne’e mós labele” nia subliña.

Salvador dehan, impedimentu ne’e tribunál la fó prazu tanba ne’e nia garante sei hadi’a, kuandu naksalak ne’e kompletu ona, ba halo fali inskrisaun iha Ministériu Justisa.

Entretantu Prezidente Tribunál Rekursu, Deolindo dos Santos deklara, partidu foun ne’ebé seidauk prienxe kritéria maka Fitun ho Os Verdes. Inkuantu Partidu foun PATIFOR ho PDS maka prienxe ona kritéria.

Jornalista: Julio Salinas Soares

Editor: Mariano Martins

No More Posts Available.

No more pages to load.