Prevene Susuk Dengue Vítima Inséndiu Husu MS Fahe Moskiteiru

by -268 views
Foto Google

DILI (Timor Post)—Inan gravida na’in sanulu resin lima (15)  no inan fó susu bebé  atus tolu resin, ne’ebé hetan dezastre hosi inséndiu iha eis merkadu Komoro aldeia 03, suku Fatuhada, postu aministrativu Dom-Aleixo, munisípiu Dili, rekomenda ba Xefe aldeia atu hatutan ba Ministériu saúde hodi husu moskiteiru, evita.

Xefe Aldeia 03 suku Komoro, Zeferino Bras, hateten nia parte simu rekomendasaun hosi vítima inséndiu liuliu hosi ba inan gravida no inan fó susu bebé ho labarik sira, husu ba Ministériu Saúde atu distribui mós moskiteiru nune’e bele garante saúde ba labarik no inan isin rua sira hodi hadook an husi moras dengue.

“Labarik ki’ik oan hosi idade 5 mai kraik hamutuk 300 resin no inan isin rua 15, presiza ajuda hosi Ministériu Saúde liu-liu moskiteiru, atu oferese ba iha uma kain ida tenke hetan 3 ka 4, atu nune’e sira labele kona moras dengue no moras sira seluk”, Zeferino Bras, ba jornalista iha eis Merkadu Komoro, Sábadu (31/07).

Xefe aldeia salienta, kuandu MS fó moskiteiru ba uma kain 1 hetan ida de’it ne’e la di’ak, tanba sira mós iha labarik barak, sé sira hetan moskiteiru 1 de’it sira nia oan ho sira seluk la bele asesu.

“Preokupasaun vítima sira nian ha’u relata ona ba Ministériu Saúde bele ajuda no mós ministériu hirak seluk sé bele fó tulun mós kona-ba moskiteiru ne’e”, Zeferino sujere.

Hatán ba preokupasaun hirak ne’e, Ministra Saúde, Odete Maria Freitas Belo, hatete, moskiteiru iha hela, importante mak dadus ne’e mai para bele halo diskusaun nune’e bele halo distribuisaun ba vítima sira.

“Moskiteiru iha, ami hanoin ami distribui ona horisehik no ohin xefe Aldeia husu atu bele hetan tan adisional ruma, tanba ba uma kain ita distribui, maibé ita mós seidauk hatene iha uma kain ida ne’e iha ema na’in hira, tanba iha Timor iha uma kain ida ne’e barak, uma kain ida ou rua, entaun ida ne’e mak tenke haree fila fali,” Odete subliña.

Tuir observasaun Timor Post iha terrenu nota katak, vítima inséndiu evakua hotu ba iha tenda ne’ebé mak Governu prepara iha Pre-eskolár nia fatin, Aldeia 03 tenda hamutuk 15, kada tenda ida iha uma kain 2 mak toba hamutuk, enkuantu kona-ba nesesidade bázika vítima sira hetan ona apoiu husi governu no NGO balun hodi konsumu loron-loron, inklui tratamentu gratuita ba inan isin rua, bebé ho labarik tinan lima mai karik.(res)

No More Posts Available.

No more pages to load.