Presiza Hadi’a Jestaun Turizmu Relijiozu

by -491 views
Foto Espesial

DILI (Timor Post)-Ba futuru, asosiasaun relijiozu presiza hadi’a jestaun ba turizmu relijiozu iha rai laran, nune’e bele dada vizitór sira ba vizita no bele fó retornu ba estadu.

Padre Angelo Salsinha, hatete planea atu dezenvolve turizmu relijiozu ho didi’ak, hadi’a jestaun ba fatin turizmu sira iha rai laran.

“Agora ita iha ona asosiasaun ida naran turizmu relijiozu ne’ebé parseria ho governu, sosiedade sivíl no USAID husi Amérika ninian,” Pe. Angelo hato’o ba Timor Post, Kuarta (06/10), Balide.

Tuir nia, ko’alia kona ba turizmu, turizmu ne’e ba ema hotu-hotu, “ita parseira no estabelese ona asosiasaun ida ne’e, asosiasaun ida ne’e hetan ona aprovasaun rejista ona iha ministériu justisa.”

Nia dehan, kuandu jestór ne’e mak di’ak ona iha fatin sítiu turizmu sira hotu, maka bele halo planu halo jestaun, halo manutensaun, halo ninia programa halo pakote viajen.

Tanba ne’e, nia afirma, iha dia 12 Outubru agora sei halo lansamentu ba públiku, nia hanoin asosiasaun ida ne’e, hamriik hamutuk ho governu, ONG sira seluk, hodi tau matan liuliu ba sítiu relijiozu sira ne’ebé eziste iha rai laran.

“Liuliu sítiu turizmu husi Maliana, Dili no Baukau, hanesan Ramelau, Soibada, Kristu Rei, Fatubesi no Oe-kusi, fatin hirak ne’e oinsá asosiasaun ne’e ho parseira sira servisu hamutuk hodi dezenvolve halo di’ak,” nia dehan.

Nia hateten, atu dezenvolve turizmu tenke tau buat hotu-hotu iha nia fatin, buat ne’ebé sagradu nian ne’e sagradu, buat ne’ebé profanu nian ne’e profanu nian.

“Agora halo parseria sira, entaun presiza demarkasaun, demarkasaun sítiu turizmu ne’e tenke klaru, haree ba baliza,” nia katak.

Depois markasaun sira ne’e, nia hatutan, haree ba medida hira, atu nune’e halo planu ba master sira ne’e, bainhira iha ona master plan iha ne’ebá, depois buka parseira sira, oinsá atu halo jestór ba fatin turizmu sira ne’e.

Kuandu buat sira ne’e la’o ho di’ak, maka sei atrai ema hotu-hotu mai, tanba durante ne’e husik livre hela, baliza mós la klaru se mak halo jestór iha ne’ebá, tanba ne’e mak buat sira ne’e mistura.

Portantu, nia parte preokupa, tanba iha fatin balun, fatin ne’ebé reza nian, ema ba halo desportu, ba namora malu iha ne’ebá halai tun sa’e iha ne’ebá.

“Ita la konsidera buat ne’ebé ita tau tuir nia fatin, ita tenke hatuur sasán sira ne’e iha nia fatin,” nia fó hanoin.

Enkuantu, asosiasaun ida ne’e, nia dehan, foku ba relijiaun lima: Budha, Hindu, Protestante, Musulmanu inklui mós Katólika rasik. Iha komitmentu ne’ebé forte, hotu-hotu hamutuk para fó liman ba malu atu ajuda governu.

Asosiasaun ne’e, foin mak harii no planu sira iha hotu ona, iha dia 12 agora foin halo lansamentu, lansamentu hotu tiha mak foin haree servisu ba oin, atu estabelese ema sira ne’ebé tun ba haree.

Tuir nia, turizmu sira bele la’o, xave mak iha governu tanba governu maka na’in ba buat sira ne’e hotu, hotu-hotu hanesan koopera kolabora ajuda tuir nia parte, buat ne’ebé atu halo jestaun polítika ne’e governu. (61L)

No More Posts Available.

No more pages to load.