Prekondisaun ba Papa Francisco Vizita Timor Leste

by -275 views
Imajen ne’e hatudu Premiadu Nobel da Paz José Manuel Ramos Horta hasoru malu ho Amu Papa Francisco iha Roma. Foto Espesial

DILI (Timor Post)—“Se hakarak Papa mai entaun tenke vasina, tanba Papa kuandu mai vizita, ita tenke vasinadu hotu ona, seguru ona mak nia mai,” Primeiru Ministru Taur Matan Ruak haktuir ba Populasaun Postu Letefoho, Munisípiu Ermera bainhira hala’o kampaña vasinasaun COVID-19.

Taur hatete, reprezentante Santa Sé iha Dili husu ba nia atu enkoraja populasaun simu vasina atu Santu Padre bele vizita Timor-Leste iha tinan oin.

Xefe Governu ne’e dehan, mensajen hosi Reprezentante Vatikanu nian iha Timor-Leste, ne’ebé husu ba Xefe Governu atu enkoraja populasaun sira simu vasina nu’udar prekondisaun atu Santu Padre Papa Francisco vizita Timor-Leste iha nia viajen papal ba Azia no Pasifiku iha inisiu tinan 2022 ne’ebé ajenadu ona hosi Vatikanu.

“Ita-boot sira rona, Reprezentante Papa nian iha ita-nia rain, ami na’in rua ko’alia nia dehan hanesan ne’e: Sr. Primeiru-Ministru ita boot bele hatete ba sidadaun sira tanba ha’u hatene Timor maioria Kátoliku,” Taur haktuir.

Foin daudauk Reprezentante Vatikanu iha reuniaun ida ho Xefe Governu haktuir inistaiva Papa Francisco nian atu vizita Timor-Leste iha tinan oin, maibe nia husu atu sarani timoroan sira tenke simu ona vasina, atu labele iha risku bainhira halibur malu lubun boot hodi simu Sua Santidade nia prezensa iha Timor-Leste.  (cao)

No More Posts Available.

No more pages to load.