PR Nomea Deolindo dos Santos Nu’udar PTR

by -870 views
Prezidente Repúblika, Francisco Guterres Lú Olo nomea Deolindo dos Santos nu’udar Prezidente Tribunal Rekursu. (Foto Tatoli)
Prezidente Repúblika, Francisco Guterres Lú Olo nomea Deolindo dos Santos nu’udar Prezidente Tribunal Rekursu. (Foto Tatoli)

(Mídia Prezidente Repúblika)

DILI (Timor Post) – Prezidente Repúblika, Francisco Guterres Lú Olo, liu husi Dekretu Prezidente Repúblika númeru 23/2021, 28 Abril 2021 nomea Deolindo dos Santos nu’udar Prezidente Tribunal Rekursu.

Prezidente Repúblika nomea Prezidente Supremu Tribunal de Justisa, entre husi juiz sira, tuir artigu 86.j, artigu 124 númeru 3, husi Konstituisaun Repúblika, konforme artigu 128, ho inerensia, Prezidente Konsellu Superior Majistratura Judisiál.

Bazeia ba artigu 164, númeru 2 husi Konstituisaun no artigu 110, númeru 1 husi Lei númeru 8/2002, 20 setembru, altera ho Lei númeru 11/2004, 29 dezembru (Estatutu Majistradus Judisiais), ne’ebé estabelese Tribunal Rekursu, enkuantu sai “Instánsia Máxima organizasaun judisiária” eziste iha Timor-Leste, ezerse kompeténsia nu’udar Supremu Tribunal de Justisa, to’o ninian funsionamentu.

Artigu 110, númeru 4 husi Estatutu Majistradus Judisiais, kompete ba Prezidente Repúblika nomea Prezidente Tribunal Rekursu. Estatutu Majistradus Judisiais hateten katak Konsellu Superior Majistratura Judisial prezididu husi Prezidente Tribunal Rekursu.

Tanba ne’e, Prezidente Repúblika, tuir artigu 86,j, artigu 124, númeru 3 no artigu 164, númeru 2 husi Konstituisaun Repúblika, no artigu 29, númeru 1, artigu 110, númeru 1 no 4 husi Lei númeru 8/2002, 20 setembru, altera husi Lei númeru 11/2004, 29 dezembru, dekreta hodi nomea Deolindo dos Santos nu’udar Prezidente Tribunal Rekursu. Dekretu ne’e prodús efeitu hahú husi 29 abril 2021.

Serimónia tomada de posse ba Prezidente Tribunal Rekursu sei hala’o aban, 29 abril, tuku 10.30, iha Palásiu Prezidensiál Nicolau Lobato.(Lee Notísia Seluk Iha Jornál Timor Post)

No More Posts Available.

No more pages to load.