Pozisaun Xanana Provoka Pro-Kontra, “Responsabilidade Lú Olo”

by -267 views

DILI—Akadémiku sira observa situasaun polítika rai laran no diálogu ne’ebé Prezidente Repúblika Francisco Guterres Lú Olo organiza dadauk tuir duni konstituisaun haruka atu hetan solusaun di’ak liu. Maibé la’ós Xanana Gusmão mak fatór determinante iha prosesu ida ne’e.

Dosente Fakuldade Siénsia Sosiál, Departamentu Polítika Públika, Universidade Nasionál Timor Lorosa’e (UNTL), Felisberto de Carvalho, subliña, maske Xanana Gusmão la marka prezensa iha diálogu entre líder istóriku sira, maibé hanesan Prezidente ba CNRT, Xanana nia estrutura ba partisipa ona diálogu ho Xefe Estadu.

Nia dehan, kompeténsia másimu iha prezidente repúblika. No iha kazu ne’e, primeiru ministru maka reprejenta governu hamutuk ho xefe estadu bainhira konkorda malu ona liuliu hakotu hún husi impase ne’e mai husi membru governu sira ne’ebé la hetan posse husi prezidente repúblika.

“Ha’u hanoin maun Xanana iha oitavo governu ne’e nia la iha kargu públiku (membru governu), nia hanesan de’it prezidente partidu CNRT, entaun impase hanesan ne’e prezidente repúblika ho primeiru ministru mak responsabilidade liu,” Felisberto subliña ba Timor Post iha kampus UNTL-Kaikoli, segunda (10/02/2020), relasiona ho Xanana la marka prezensa iha diálogu ne’ebé Lú Olo marka ho líder istóriku sira inklui Eis-Prezidente Ramos Horta, Eis-Prezidente no atuál Primeiru-Ministru, Taur Matan Ruak,   Eis- Primeiru Ministru Mari Alkatiri, Xefe Estadu-Maior-Jenerál F-FDTL, Majór-Jenerál Lere Anan Timur no veteranu Roque Rodrigues, no Eis-Prezidente Repúblika no Eis-Primeiru-Ministru  Kayrala Xanana Gusmão rasik.

Felisberto hatete, povu hotu hein desizaun Lú Olo nian ne’ebé di’ak liu no hakotu duni impase pol’itika iha rai laran atu konsentra ba dezenvolvimentu nasionál.

Entretantu Observador Polítika husi Universidade Nasionál Timor Lorosa’e (UNTL), Júlio Aparício, hatete, ho Xanana la marka prezensa iha diálogu líder istóriku sira ne’e sei fó impaktu hodi hakotu situasaun polítika dadauk ne’e.

“Kuandu maun Xanana mak la ba ne’e klaru iha impaktu boot ba impase polítika i bele hanaruk impase ne’e tanba maun Xanana ema ida ne’ebé autor ba rai ida ne’e ne’ebé nia prezensa importante tebes iha enkontru refere,” Júlio subliña ba Timor Post iha nia kna’ar fatin kampus UNTL-Kaikoli Dili.

Maske nune’e, Júlio fiar katak, ho baze konstituisaun fó kompeténsia ba prezidente repúblika sei foti desizaun hotu ho tetu sira durante ne’e nia halo ona ho partidu polítiku ho entidade hotu.

Iha fatin la hanesan Observador Polítika husi Universidade de Dili (UNDIL), Hugo Lourenço, hatete, aman ba nasaun la’ós Xanana maibé prezidente repúblika ne’ebé nia foti desizaun iha situasaun hanesan ne’e mós tenke kuidadu nune’e labele hamonu ninia imagen hodi povu labele lakon konfiansa ba nia.

“Pozisaun maun Xanana mós loos dehan katak ha’u la’ós aman ba estadu. Aman ba estadu maka prezidente republika, nia tenke ser foti desizaun ne’ebé di’ak para labele hamonu mós ninia figura, povu nia konfiansa ba nia,” Hugo subliña.

Observador Politika UNDIL ne’e mós esperansa katak maski maun Xanana la marka prezensa Maibé nafatin fiar prezidente sei foti desizaun ne’ebé di’ak ba povu rai ida ne’e.

“Más ha’u fi’ar katak prezidente republika hatene liuhosi konsellu estadu pasti sei iha rezultadu ne’ebé di’ak atu deside situasaun politiko ne’e,”

Kayrala Xanana Gusmão la partisipa iha diálogu ne’e ho rajaun tuir konfirmasaun ne’ebé Timor Post hala’o katak, hafoin partisipa entrevista espesial iha televizaun, Xanana aranka kedas ba Lospalos ho objetivu ba kari aifunan ba nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem.

Xanana marka ajenda ne’e tanba bainhira nia inan haki’ak Saudoza Jacinta hakotu iis iha loron 24/01/2020, nia la partisipa.

Tuir ajenda, hafoin kari aifunan ba Saudoza Jacinta, Xanana sei halo vizita ba fatin istóriku sira iha Lautem no sei fila ba Dili iha loron Tersa (11/02/2020). (ato)

No More Posts Available.

No more pages to load.