Povu Kontente Fa’an Produtu Iha Dili

by -59 views
Foto Google

DILI (Timor Post) Negosiante merkadu Kalan iha area Tasi-Tolu, suku Madohi, kontente tanba governu loke ona dalan ba povu sira lori produtu lokál tama mai sidade Dili hodi fa’an iha merkadu.

Martinho Lobato ba Timor Post, Sesta (23/07) haktuir, sira kontente tanba dalan nakloke ona ba sira atu fa’an sira nia produtu lokál, liuliu modo tahan sira ne’ebé povu agrikultór sira lori husi munisípiu mai fa’an iha sidade Dili.

“Ami agradese tanba ita nia governu hahú loke ona dalan ba ami povu ki’ik sira hodi lori produtu lokál, liuliu modo tahan sira ne’e mai fa’an iha sidade Dili para hetan osan uitoan,” dehan Martinho iha Merkadu Tasi-Tolu.

Martinho husu governu atu bele kontrola variante sira ne’e para labele afeta ba povu, más tenke kontrola maka’as iha fronteira atu ema labele tama sai ita nia nasaun, husik povu sira mak la’o livre iha rai laran atu bele halo negósiu hodi bele sustenta ba sira nia moris.

“Ami mós hatene ita nia governu tenke kontrola para labele hada’et virus ne’e mai ita, maibé ha’u sujere di’ak liu kontrola maka’as iha fronteira, labele husi ema tama sai arbiru, husi ami povu sira la’o livre hodi halo negósiu hodi sustenta ami nia an,” Martinho hatete.

Entertantu, iha fatin hanesan Margarida Ribeiro, inan feton ida ne’ebé aluga karreta tula modo mai husi Ermera sente kontente, tanba bele liu hodi fa’an modo ne’ebé mak nia fa’an ba negosiante sira iha Dili laran.

“Ami nia vida mak fa’an modo hodi sustenta ami nia família, ne’ebé ohin loron ne’e sente kontente tanba bele lori ha’u nia modo tama mai fa’an iha Merkadu Tasi-Tolu,” negosiante husi Ermera, Margarida ba Timor Post.

Tanba ne’e, nia husu nafatin Governu, lider sira hotu labele izola hela povu baibain sira tuur metin, hodi hetan hamlaha, maibé ho situasaun sira ne’e oinsá maka governu tenke buka solusaun fó kondisaun ba povu atu hala’o sira nia atividade ekonomia sira ne’e.

Nia subliña, tanba virus ne’e la’ós mosu husi Timor-Leste mak ba rai li’ur maibé husi nasaun seluk maka tama mai entaun di’ak liu taka metin tiha ita nia fronteira sira tama mai husi povu rasik mak la’o livre iha rai laran hodi hala’o ida-idak nia servisu atu bele dezenvolve nia rain.(f10)

No More Posts Available.

No more pages to load.