Postu Administrativu Ataúru Nakfilak ba Munisípiu

by -531 views
Mapa

Jornalista Jaime Pires / Editór Noémio Falcão

Dili (Timor Post)—Governu liuhusi Ministériu Administrasaun Estatal planeia ona muda estatutu Postu Administrativu Ataúro ba Munisípiu. Iha fulan Janeiru tinan 2022, Konsellu Ministru sei deside administradór  ida hodi administra munisípiu foun ne’e.

Ataúro sai munisípiu, total munisípiu iha Timor Leste hamutuk 13 inklui Aileu, Ainaro, Bobonaro, Likisá, Manatutu, Lautem, Vikeke, Dili, Ermera, Manufahi, Kovalima, Baukau, Ataúro no Rejiaun Administrativu Espesial Oekusi Ambeno (RAEOA) Ataúru hahú funsiona ona hanesan Administradór Munisípal ida, no Konsellu Ministru sei nomeia ema ida atu lirera.

Ministru Administrasaun Estatal, Miguel Pereira de Carvalho subliña, hanesan munisípiu, Ataúro mós iha kompeténsia atu ejekuta orsamentu sira kada tinan hanesan ho munisípiu sira seluk.

“Iha tempu Janeiru nia laran konsellu Ministru sei halo deliberasaun atu hatudu ema ida atu sai hanesan Administradór Munisípal Ataúru, hanensan primeiru aktus administrativu ne’ebé mak governu sei halo atu administradór Ataúru ne’e funsiona,” Ministru Miguél ba Jornalista sira iha Palásiu Governu, (29/12/2021).

Hafoin ne’e, governante ne’e dehan, administradór mak sei nomeia sekretáriu munisípiu no diretor servisu Munisípal Administrasun Munisípiu Ataúru nian atu bele hahú funsiona iha fulan Janeiru nia laran.

“Atu bele implementa planu de atividade no mós planu orsamentu ne’ebé mak Parlamentu Nasionál aprova ona, iha tinan oin Ataúru mesak de’it sei jera orsamentu purvolta $2.5 Milloes dólar amerikanu diferente ho Munisípiu sira seluk,” dehan Miguel.

Nia hatutan, Administrasun Munisípiu Ataúru mós sei halo kolaborasaun ho konsellu Administrasaun fundu espesial dezenvolvimentu Ataúru nia sei jere mós orsamentu hamutuk $13 Milloes ne’ebé mak alokadu ona ba iha Munisípiu Ataúru atu halo dezenvolvimentu dosiu ekonómiku iha Munisípiu Ataúru.

Ne’ebé Administrasun Ataúru sei hahú funsiona iha Janeiru ho instalsaun administradór Munisípiu ho mós ajente administrasun públiku ho dirijente sira ne’ebé mak atu servisu hamutuk.

“Kona-ba edifisiu Administrasun Munisípiu Ataúru nian tékniku sira konklui ona dezenu no konsellu administrasaun espesial fundu infraestrutura Ataúru sei halo desizaun aprova modelu ba konstrusaun  sei haruka ba iha komisaun nasionál ba aprovizionamentu hodi loke konkursu ba ida ne’e,” Nia hakotu.

No More Posts Available.

No more pages to load.