Lú Olo sei fó Posse ba Membru Governu Na’in-8 Hafoin Deklarasaun Estadu Emerjénsia Datoluk

by -491 views

DILI—Primeiru Ministru Taur Matan Ruak entrega ona lista membru governu foun ba Prezidente Repúblika Francisco Guterres Lú Olo. Hafoin haree hotu kurikulum vitae husi kandidatu membru sira, posiblidade Xefe Estadu sei fó posse uluk ba membru na’in-8 hodi kompleta estrutura governu daualu.

Membru na’in-8 ne’e tuir fonte kredivél Timor Post haktuir, Armanda Berta (KHUNTO) atuál Ministra Solidariedade Sosiál (MSS) sei asumi fali pasta nu’udar Vise Primeiru Ministru; Fidelis Magalhães (PLP) atual Ministru Reforma Lezislativa Assuntu Parlamentar  (MRLAP) sei asumi fali pasta Ministru Prezidénsia Konsellu Ministru troka Agio Pereira.

Tuir fali Fernando Hanjam (FRETILIN) sei asumi pasta Ministru Finansas; Odete Belo  (FRETILIN) asimu pasta Ministra Saúde, Pedro Reis (FRETILIN) asimu pasta Ministru Agrikultura i Peskas; Meta Malik (PD) Ministru Veteranos i  Antigu Kombatente; Miguel Carvalho Pereira (FRETILIN) asumi pasta Ministru Administrasaun Estatal no Francisco Jerônimo (FRETILIN) asumi pasta Ministru Assuntu Parlamentares no Komunikasaun Sosiál.

To’o notísia ne’e públika Timor Post seidauk hetan dekretu Prezidensiál, maibé fonte haktuir, posibilidade tomada de posse realiza iha loron Sesta (29/05/2020).

Maske nune’e, Bankada CNRT ho nia aliadu sira UDT/FM ho PUDD kontinua konsidera governu daualu lideradu Primeiru Ministru Taur Matan Ruak monu ona no liuhusi konferénsia ba imprensa ne’ebé hala’o iha loron 27/05/2020, iha sala Bankada CNRT, CNRT ho nia aliadu sira akuja governu ho prezidente repúblika ho konsientemente uza Estadu Emerjénsia (EE) COVID-19 hodi halo manobras polítika oioin, inklui husu tán renovasaun EE ba dala-tolu.

“Intensaun klaru, ho enxtensaun EE ida-ne’e, sira hakarak atu hametin sira-nia Poder ne’ebé hetan hosi dalan illegal no inkonstitusional,” subliña iha komunikadu.

Entretantu Prezidente Repúblika simu ona proposta estensaun estadu emerjénsia husi governu lideradu Taur Matan Ruak, no husu ona autorizasaun ba Parlamentu Nasional atu deklara tan Estadu Emerjénsia ba datoluk hahú iha loron 28 Maiu to’o 27 Juñu 2020.

Rajaun governu estende tan estadu emerjénsia hodi fó biban ba governu luta kontra pesti corona (COVID-19).

Timor-Leste deklara kazu pozitivu ida ho COVID-19 iha loron 21 marsu 2020, ho Estadu nia naran, iha 27 marsu 2020 Prezidente Repúblika deklara estadu emerjénsia ba fulan ida. Prezidente Repúblika estende estadu emerjénsia ba loron-30 tan, husi 28 abril to’o 27 maiu 2020.

Entretantu Timor Leste konsege rejista kazu pozetivu ba COVID-19 hamutuk ema na’in 24, maibé rekoperadu iha semana hirak liu ba.

Atualizasaun dadus mundial, iha loron 26/05/2020 haktuir, infetadu hamutuk 5,588,020, mate hamutuk 347,872 no rekoperadu hamutuk 2,365,703. (cao)

No More Posts Available.

No more pages to load.