Posibilidade Governu Estende Tan EE Ba Dalimak

by -588 views

Timor Post (24/08/2020)- Posibilidade governu sei estende tan Estadu Emerjénsia (EE) ba dalimak hodi prevene pesti korona tama mai iha Timor-Leste.

Koordenadór Jerál Sentru Jestaun Krize no Sala Situasaun, João Miranda ‘Aluc Descarantes’, Segunda (24/08) hasoru Primeiru Ministru no Ministru Interior Taur Matan Ruak ko’alia kona-ba situasaun covid-19 iha Timor-Leste.

“Maluk timoroan sira ne’ebé mak tendénsia tuir dalan ilegál ne’e Primeiru Ministru preokupa oinsá mak atu asegura ida ne’e, liu-liu iha fronteira”, ALuc informa ba Jornalista iha Palasiu Governu.

Bainhira jornalista konfirma karik sei iha tan estadu emerjénsia, exercito ne’e hatán nia la adianta informasaun ida ruma maibé hein de’it evolusaun Covid.
“Ba Estadu Emerjénsia ha’u labele adianta. Ida ne’e sei diskute iha Konsellu Ministru, maibé ita hare evolusaun situasaun ne’e mantein ho ritmu ida hanesan ne’e bele estende tan”, hateten Aluc.

Aluc deklara, maski Timor iha kazu foun ida de’it no ema estranjeiru, maibé iha nasaun viziñu sira ninia tensidade sei maka’as.

“Atensaun mai ita hodi oinsá mak atu prevene liu-liu medidas prevensaun tenke forte. Tanba ne’e mak dala ruma sei estende tan estadu emerjénsia atu hakmatek no akompaña, tanba to’o agora nasaun avansadu sira mós seidauk iha ai-moruk vasina kontra virus ida ne’e”, hatutan eis Gerilleiru.

Enkuantu estadu emerjénsia dahaat fulan ida ne’e sei termina iha loron 04 Fulan Setembru 2020 ka falta semana ida resin tan.(Jornalista: Jaime Pires)

No More Posts Available.

No more pages to load.