Pontu Neen husi Konferénsia Episkopál Timorense kona-ba Prevensaun Virus Corona

husi -20 views

DILI—Surtu Virus Korona (COVID-19) ne’ebé daudaun ne’e sai ona preokupasaun mundiál, Konferénsia Episkopál Timorense hasai komunikadu pastoral ida atu akonsella prevensaun durante selebrasaun misa.

Kreda Katólika iha nia selebrasaun sira halibur ema barak no kreda sai fatin ne’ebé ema barak ba, bainhira moras ida seidauk hada’et, akonsella prevensaun balu durante ita nia selebrasaun sira, hanesan  liman labele kona aguabenta fatin ne’ebé iha uma kreda nia odamatan, evita rei estátua sira ne’ebé iha uma kreda laran,  lalika kaer liman bainhira fó pás ba malu, simu de’it komuñaun iha liman, evita hola bensa ka rei liman. Igreja mós fó konsellu ba sira ne’ebé mak moras no  isin fraku, atu lalika mai misa, reza iha uma de’it.

Amu Pároku Parókia Imaculada Conceição Balidi, Padre Graciano Santos Barros, iha selebrasaun misa domingu (15/03),  lee sai komunika pastoral hosi Konferénsia Episkopál Timorense katak Virus Korona nu’udar moras foun ida ne’ebé perigu ba vida ne’ebé hada’et ba mundu tomak (epidemia mundiál) no  nasaun lubuk ida mak halo ona prevensaun ba moras ida ne’e.

Moras ida ne’e pasa liuhosi kontaktu isin nian, maski  iha Timor-Leste ita seidauk hetan kazu konfirmandu, ne’e duni husu ba povu tomak atu kalma nafatin, maibé di’ak liu ita halo prevensaun atu evita moras ida ne’e labele kona ita.

Tanba ida ne’e, Igreja Timór hamutuk ho Amu Papa ne’ebé mós halo nia prevensaun ba moras ne’e, konvida ita atu halo tuir rekomendasaun hosi Organizasaun Saúde Mundial no pesoál saúde nian.

Atu fase liman beibeik, kuidadu fatin moos, fani no mear tenke taka ibun, evita atu kontaktu ho ema seluk, evita atu labele kontaktu ho animal fuik, membru família sira ne’ebé foin fila husi rai li’ur mai evita atu halo kedas kontaktu fízika hanesan kaer liman, rei malu no hakuak malu.

Amu Graciano hateten, biar mundu tomak no ita mós liu hela hosi prova ida ne’e, ita hatene katak Na’i Maromak sei la taka matan no tilun ba ita nia harohan, ne’e duni husu atu ita hotu reza,  hanesan Salmista dehan,  “rahun di’ak ba sira ne’ebé tau fiar iha maromak”

“Ne’e komunikadu pastoral, mai hosi Konferénsia Episkopál Timorense nian, ida ne’e mak ofisial, sira seluk parókia balu fó sai ida ne’e ilegál, halo tuir buat ne’ebé mak ohin fó sai,” Amu Graciano informa.

Padre vigáriu Parokia Motael Mariano Maia lee sai komunikadu pastoral iha misa datoluk domingu (15/3), katak maski Timor-Leste sidauk iha kazu konfirmadu maibé husu ba povu tomak atu kalma nafatin, di’ak liu ita halo prevensaun atu evita moras ne’e labele kona.

Amu akresenta, biar iha mundu tomak liuhosi prova ida ne’e, husu sarani katóliku hotu atu reza hanesan santu sira dehan rahun di’ak ba sira ne’ebé tau fiar iha Maromak.

Komunikadu pastoral ne’e mai husi prezidente Konferénsia Episkopál Timorense, Dom Norberto Amaral, Sekretáriu Jerál Dom Basílio do Nascimento, Arsebispu de Dili no pro-prezidente da sé Dom Virgílio do Carmo da Silva. (Timor Post)