Ponte Naksobu: Governu Resposta Tarde, Komunidade Bekussi husu Tulun ba Xanana

by -1.527 views
Imajen ne’e hatudu Líder Nasionál Kayrala Xanana Gusmão ho nain ba Kompañia Montanha Diak, Lay Fun Chen halo observasaun iha terrenu. Foto TP: Jaime Pires

Jornalista Jaime Pires / Editór Noémio Falcão

Dili (Timor Post)—Ponte kiik ida iha ponte boot Bekussi Dili ne’ebé Primeiru Ministru Taur Matan Ruak iha fulan hirak liu ba deside sobu nia sorin ba parte lorosa’e nian naksobu tanba udan tau maka’as iha loron Segunda (03/01/2021).

Bainhira ponte ne’e hahú kuak iha klaran, Ministru Obras Públika (MOP), Salvador Pires ho ekipa tún kedas ba terrenu hodi observa no hadi’a, maibé tanba liu tiha loron ida laiha resposta maka komunidade iha área ne’e husu tulun ba Líder Nasional Kayrala Xanana Gusmão.

Udan iha loron tolu tutir malu ameasa tebes komunidade sira bainhira ponte ne’e kotu total. Nune’e, iha loron 05/01/2021, Xanana hanesan baibain  udan monu rai la’o haleu sidade no hamoos baleta sira, too iha Bekusi, komunidade sira hatoo sira nia preokupasaun kona-ba ponte kiik ne’e no husu tulun ba Xanana.

“Avo ajuda ami lai tanba ponte ne’e monu loron tolu ona, parte governu liuhusi Obras Públika mai haree dala tolu ona inklui sukat hotu ona maibé to’o agora sira la mai hadi’a. Se governu nia atendimentu kleur orsida kalan ka aban udan mai tan bele fó afeta ba uma kain lubun ida iha ne’e,” komunidade sira husu tulun ba Xanana bainhira líder karikmátiku ne’e halo observasaun ba bee dalan sira iha área ne’eba.

Rona preokupasaun hirak ne’e, Xanana halo kontaktu kedas ba nain Kompañia Montanha Diak, Lay Fun Chen no iha minutu hirak nia laran to’o fatin observa no halo kedas planu tula material konstruksaun ba halo servisu hahú iha loron 06/01/2022.

Iha oportunidade, Xanana husu kedas ba joventude sira iha área ne’e atu hotu-hotu servisu hamutuk ho kompañia Montanha Diak bele finaliza lalais ponte kiik ne’e.

“Agora kalan ona ami fila ona, aban dader kompañia ne’e sei lori material mai hodi hadi’a, husu ba joven sira aban dader hotu-hotu mai servisu tanba ponte ne’e di’ak ba imi,” Xanana  subliña ba joven sira.

Iha loron ne’e duni, Jornalista sira konfirma ho Ministru Obras Públika, Salvador Pires iha Palásiu Governu, maibé hatan katak, kona-ba Ponte Bekusse ne’ebé mak besik monu nia prosesu sei iha komisaun aprovizionamentu nia liman.

No More Posts Available.

No more pages to load.