LIKISÁ (timorpost.com)-Tanba Konsidera gasta osan arbiru, Prezidente Partidu CNRT, Kay Rala Xanana Gusmão, hatete bainhira povu fó fiar iha eleisaun parlamentár 2023, ba kaer ukun sei lori Governasaun ne’ebé lideradu Taur Matan Ruak ba Tribunál.
Xanana Gusmão, deklara perante militante, simpatizante no apoiante sira, iha kampaña aberta Partidu CNRT nian, ne’ebé realiza iha kampu futeból munisípiu Likisà Villa, Segunda (08/05/2023).
Lider Nasionál ne’e dehan, durante governasaun CNRT, monta ona sistema ne’ebé kapas tebetebes no hetan ona apresiasaun husi komunidade internasional, maibé governu ai-tonka ida ne’e estraga tiha sistema sira ne’e, liuliu kona-ba transferénsia.
“Tanba osan ne’ebé iha fundu petroleu, pertense ba Povu ne’ebé liberta ita-nia rai ne’e, la’ós ba partidu ida, la’ós ba ema ida”, Xanana afirma.
Nia hatete, CNRT iha tinan 10 gasta osan billiaun 10 USD resin, la halo buat ida, na’ok de’it osan, ho ida ne’e mak Primeiru Ministru agora ne’e ba to’o iha Parlamentu dehan Xanana Suharto Kedua.
Maibé, ida ne’ebé bolu nia Xanana Suharto Kedua ne’e, iha tinan lima nia laran de’it estraga ona osan billiaun 11 USD, ne’e halo saida.
“Ne’e katak estraga osan, kuandu estraga osan hanesan ne’e viola ita-nia sistema sira ne’e, tanba osan Povu nian, Povu ne’ebé terus mak ita hetan ukun an, labele hasai satu dolar pun husi fundu petroleu sein liuhusi regras,” Xanana ko’alia ho lian makas.
Nia hatutan, “Ohin loron mós sira gasta buat sira ne’e ita la hatene relatóriu iha ne’ebé, laiha relatóriu, sesta bazika sira-nia emprezáriu sira mak hetan di’ak, Povu simu hudi dodok, tanba ita-nia estadu iha rai li’ur no rai laran mós Malae sira haree, dehan ita-nia estadu atu monu ba rai, tanba osan Povu nian gasta arbiru, laiha liu relatóriu, tanba ida ne’e mak ita hotu hamrik iha ne’e atu hili CNRT, hodi ita ba hamoos tiha fo’er ne’e”.
“Maski ha’u katuas ona, bainhira iha dia 21 imi ba vota, husu ba ha’u atu ba ka’er governu, ha’u prontu atu servi no prontu atu lori ema sira ne’ebé estraga Povu nia osan, lori ba Tribunal”, Xanana promete.
5,100 total views, 3 views today
Bele hare Video Seluk :