DILI—Grupu Mulheres Parlamentares Timor-Leste(GMPTL, sigla portugés) servisu hamutuk ho Plan Internasionál Timor-Leste realiza semináriu nasionál hodi promove feto, joven no ema ho defisiénsia sira nia partisipasaun iha eleisaun inkluzivu iha Timor-Leste.
“Ami hósi GMPTL hamutuk ho parseiru Plan Internasionál Timor- Leste ne’ebé hetan fundus hosi Uniaun Europeia hodi hasae koñesimentu edukasaun sívika ba publika kona-ba partisipasaun feto no ema ho defisiénsia sira iha eleisaun”, dehan Sekretaria GMPTL, Elvina Sousa, ba Jornalista sira iha salaun Delta Nova, Kinta(13/04/2023).
Nia esplika, eleisaun eskluzivu mak eleisaun ne’ebé fó mós oportunidade ba maluk defisiénsia sira no fó oportunidade kondisaun ne’ebé asesivel ba maluk sira atu bele asesu ba sentru votasaun.
“Tanba ita haree katak iha sentru votasaun barak mak la sensivel ba maluk defisiénsia liu-liu ba maluk sira ne’ebé uza karreta roda”, sekretáriu informa.
Nia hatete, semináriu refere halibur sosiedade sivíl sira, autoridade lokál no partidu polítiku sira hotu atu bele hetan informasaun kona-ba eleisaun no mós rona barreira no difikuldade ne’ebé sira hasoru.
Iha fatin hanesan Diretora Interina Plan Internasionál Timor-Leste, Fatima Estrela Soares, reforsa tan katak, semináriu nasionál ho tema “hakbiit feto foinsae no ema ho defisiénsia sira atu partisipa iha eleisaun inkluzivu iha Timor-Leste” durante loron rua.
“Lori ekipa Plan Internasionál Timor-Leste, Uniaun Europeia no parseiru sosiedade sivíl sira, inklui Rede Feto, ADTL, Belun, JPIC, MOFFE& Caucus, ami haksolok bele realiza hamutuk eventu ida ne’e ho parseria ho GMPTL hodi promove feto, joven no ema ho defisiénsia sira nia partisipasaun iha eleisaun”, nia deklara.
No sira fiar katak, fornese espasu ba feto, joven no ema ho defisiénsia sira atu partilla dezafiu no hanoin sira hodi kontribui ba ultrapasa dezafiu sira iha prosesu eleisaun.
Alende ne’e Embaixadora Interina no Enkarregada Negósiu Delegasaun Uniaun Europeia iha Timor-Leste, Dorthe Wacker, afirma Uniaun Europeia nu’udar entidade ne’ebé apoiu makaas ba demokrasia no direitu umanu iha Timor-Leste ho kompromisu ida ne’e demonstra liuhosi asaun prátiku ba projetu eleisaun demokrátiku no inkluzivu.
1,587 total views, 3 views today
Bele hare Video Seluk :
Subscribe to Timorpost
