DILI—Xefe Bankada Kongresu Nasionál Rekonstrusaun Timorense (CNRT sigla portugés), husu ba Prezidente Repúblika José Ramos Horta ho Primeiru Ministru Taur Matan Ruak presiza iha unidade.
Tuir Duarte, destinu nasaun nee iha órgaun rua nee nia liman, tanba nee tenke iha unidade nasionál no armoniza polítika dignu ba nasaun Timor-Leste.
“Prezidente repúblika ho primeiru ministru laiha armonizasaun, tanba nee hanesan órgaun parlamentu nasionál, husu atu hamutuk hodi serve nasaun no povu nia moris”, Duarte hatoo asuntu nee ba jornalista sira iha PN, Kinta (23/03).
Nia dehan, labele lori órgaun ho órgaun sai fali ba problema interna, karik prezidente repúblika ka primeiru ministru nee lider ida atu serve povu no nasaun, tanba nee lori órgaun parlamentu nasionál husu atu hamutuk, karik iha problema uma laran depois resolve, maibé tuir kompeténsia órgaun estadu, tenke unidade no sai prinsípiu ida ba povu.
“Ami husu ba nai ulun sira, Ramos Horta ho Taur Matan Ruak, tenke iha unidade hodi koalia estadu nia problema, tanba imi hamriik tanba povu nia interese. Maski sira-rua la hasoru malu, ita husu atu hasoru malu, maibé hau sente laiha implikasaun ba eleisaun parlamentár, no ita garante katak situasaun hothotu lao ho diak”, nia afirma
Molok hakotu, Xefe Bankada CNRT nee fiar katak Xefe Estadu ho Xefe Governu sei hamutuk nafatin, hodi lori nasaun no povu nia interese ba oin, tanba nasaun nia destinu iha órgaun rua nee nia liman.
867 total views, 3 views today
