Polísia Relata Kronolojia Kompletu ba Asaun Totrtura hasoru Joven Na’in-Rua

husi -57 views

Timor Post (22/03/2021)—Komandu Polísia Munisípiu Dili asegura ona joven na’in-rua ne’ebé hetan tortura ho grupu ne’ebé halo asaun hatudu iha vídeo sai veral iha rede sosiál. Grupu rua ne’e (joven na’in-rua ho joven ne’ebé halo tortura) konsideradu komete hotu krime.

Komandante Daruak Polísia Munisípiu Dili, Euclides Belo haktuir kronolojia husi akontesimentu ne’e, fofoun joven na’in-rua maka komete uluk krime halo asaltu no estraga komunidade sira nia sasan iha Kampu Alor.

Polísia konsidera asaun ne’e krime danu estraga sasan husi joven na’in-rua ho inisiál AC no AD. Joven na’in rua ne’e inklu ida ne’ebé tattoo iha kakorok “anti PNTL, FDTL no BOP”.

Maibé, iha fali grupu ida halo kapturasaun ba joven-rua ne’e lori ba baku mak foin lori ba entrega ba polísia.

Polísia buka tuir nafatin ema hotu ne’ebé partisipa iha asaun krime hodi kumpri auto prosesual.

“Devia sira kaptura ona, aguarda de’it komunika mai polísia ba foti hodi submete ba investigasaun ou submete ba partisipasaun prosesuál hodi responde ba aktu ne’ebé sira na’in-rua komete. Maibé mosu fali tan asaun krime seluk,” Euclides subliña ba Jornalista sira.

Euclides hatete, nia parte sei la halis ba parte ida, maibé haree de’it ba faktu asaun krime sira ne’ebé akontese.

Euclides subliña, iha kódigu penál haktuir, ema ho meius saida de’it ho fízikamente halo terus no hakanek ema ne’e krime.

“Agora, tanba-sá mak akontese, ne’e sei responde aktu sira ne’e ba seksaun investigasaun kriminál,” nia hatutan.

Joven na’in-hirak ne’ebé tula joven na’in-rua iha karreta laran ne’ebé dehan lori joven na’in-rua ba Bebonuk, ikus mai tula joven na’in-rua ba entrega ba polísia UEP (Unidade Espesiál Polísia) iha Bairro-Pite, no ikus mai sira mós entrega-an ona ba polísia Eskuadra Aimutin.

“Komandante eskuadra Aimutin mak toma konta ba ninia kazu. Sei foti nia deklarasaun hodi kompleta auto prosesuál,” Euclides haktuir.

Kona-ba joven na’in-rua nia kondisaun saúde hafoin hetan torturasaun, Euclides hatete, polísia submete ona ba teste médiku no fila ona ba seksaun kriminál no kona-ba gravidade husi joven na’in-rua kompeténsia médiku nian mak bele fó sai.

Euclides dehan, polísia iha espasu ba atu anúnsiu kondisaun saúde ema nian ba públiku maibé tanba kompeténsia parte ida-idak nian maka polísia rejerva ba kompeténsia ministériu públiku.

Polísia dehan investigasaun ba kazu ne’e sei la’o hela. Grupu ne’ebé halo tortura ba joven na’in-rua prosesu la’o iha Komandu Polísia Eskuadra Don Aleixo.

Jornalista Cesaltina Ximenes

Editór Noémio Falcão