Polísia Prende Motorizada 66 iha Palásiu Governu Oin, Tolerásia Ida De’it

by -721 views
Imajen ne'e hatudu motorizada hirak ne'ebe polisia prende.

Jornalista Jaime Pires / Noémio Falcão

DILI (Timor Post)— Polísia Nasionál Timor-Leste (PNTL) liuhusi Departamentu Nasionál Trânzitu no Seguransa Rodoviária (DNTSR) intensifika nia servisu halo kontrola movimentu transporte iha estrada públiku ne’ebé kontra kódigu Estrada.

“Ita konsege prende tan motorizada governu nian tolu, motorizada privadu iha 61 inklui dokumentu motor rua, entaun hamutuk 66 mak ita rekolla,” haktuir Sub Xefi DNTSR, Inspetor Xefi Polísia, Inocençio Freitas ba Jornalista sira bainhira hala’o atividade pasa revista, Tersa (17/08/2021) lorokraik iha Palásiu Governu oin.

Inocençio subliña, orientasaun komandu hato’o ba komandante sira no ba membrus tomak hodi regulariza seguransa rodoviaria liu-liu haree ba karta kondusaun no-mos asesores transporte sira hanesan xapa matríkula, ispellu no lampu laiha.

“Ida ne’e ita konsidera infrasaun, maibé ba transporte sira ne’ebe dokumentu mate durante Estadu Emerjénsia ita konsidera vale nafatin,” esplika Inocençio.

Nia dehan, durante ne’e Polísia Tranzitu sempre fo hanoin bebeik ba Motorista sira atu uza transporte tenke kompleta lai rekezitus sira hanesan lori dokumentu própriu no monta asesoris transporte nian antes halo movimentu iha estrada públiku.

Inocençio subliña, motorista sira ne’ebé kontra ona lei kódigu estrada tenke kompleta uluk lai prosesu administrasaun hodi selu multa iha banku hafoin ba foti motorizada iha polísia nia liman.

Hafoin pasa revista, membru trânzitu sira transporta kedas motorizada hirak ne’e ba asegura iha Kuartel Jerál PNTL, Kaikoli-Dili.

No More Posts Available.

No more pages to load.