Polísia Lori ona Richard Dasbackh ho Joven Ida husi Oekusi ba Prizaun Bekora

by -5.240 views
Imajen ne’e hatudu iha Aeroportu Internasionál Rota do Sandalo, RAEOA. Foto Espesial

Dili (Timor Post)—Polísia Rejiaun Autónomu Espesiál Oekusi Ambeno (RAEOA) lori ona Eis Padre Amerikanu Richard Dasbackh hamutuk ho joven ida metin ho aljema (borgol) ba hatama iha Prizaun Bekora-Dili, Kuarta (22/12/2021).

Observasaun Timor Post haktuir, polísia akompaña Richard Dasbackh la uza aljema ho joven ne’ebé deskonfia komete krime tentativa seksuál sa’e aviaun ho marka ZEESM, tuku 9 dader sai husi Aeroportu Internasionál Rota do Sandalo, to’o iha Aeroportu Komoro, Dili tula kedas iha karreta ba Prizaun Bekora.

Richard Dasbackh kondenadu komete kazu violasaun seksuál hasoru menoridade iha Orfonato Topu Honis ne’ebé nia rasik maka harii dezde tempu okupasaun Indonézia hodi tau matan ba oan ki’ak no inan faluk sira iha rai ketan ne’e no husi fatin seluk iha Timor laran.

Tribunál Rejiaun Oekusi pronunsia desizaun ba Richard Dasbackh iha loron 21/12/2021 ho kadeia tinan 12.

Hafoin Tribunál foti desizaun ne’ebé akompaña mos husi Líder Nasionál Kayrala Xanana Gusmão nu’udar mos sasin ba kazu ne’e, Defeza Richard Dasbackh, Miguel Faria afirma nia lamentasaun ba deizaun ne’e no sei halo rekursu ba tribunál rekursu hodi anula desizaun tribunal primeira instansia ne’e. (cao)

No More Posts Available.

No more pages to load.