Polísia Kaptura Ona Suspeitu Ataka Leandro Xena

by -2.127 views
Imajen ne'e hatudu akontesimentu iha Bebora, Dili. Foto Espesial

DILI (Timor Post)- Polísia Nasionál Timor-Leste (PNTL) liuhusi Eskuadra Vera Kruz, Kaikoli, Munisípiu Dili kaptura ona suspeitu na’in ida ne’ebé ho nia kolega sira asalta Leandro Xena iha Bebora, Dili, Kinta (05/08/2021) lorokraik.

Observasaun Jornalista Timor Post haktuir, Sesta (06/08) polísia kaptura suspeitu na’in-ida no na’in-rua seluk entrega-an.

Hafoin suspeitu sira iha ona polísia nia liman, polísia halo kontaktu ho Leandro Xena hanesan vítima ba haktuir kronolojia akontesimentu.

Ba Jornalista sira, Leandro haktuir, nia laiha problema antes ho suspeitu sira. Tanba sira koñese malu hela maka iha lokraik ne’e nia husi nia uma Tasi Tolu ba uma Bebora atu foti sasan ruma iha nia ferikoan, bainhira to’o ba suspeitu sira hamriik hela iha nia uma oin no nia konsege hasee ho di’ak suspeitu sira, maibé ida mak hatan ho lian maka’as ba nia no nia simu maka sira na’in tolu ataka lisuk nia.

“Ha’u durante ne’e nunka halo problema no ha’u nunka ransu ho sira maibé ami koñese malu,” Leandro haktuir ba Jornalista sira iha edifísiu PNSK Kaikoli, Sesta (06/08/2021).

“Ha’u ba sira tuur ona iha uma oin, entaun ha’u hasee sira no ha’u tama tiha ba loos laran ha’u sai fali mai ha’u hasee sira dehan maun alin sira tur ba, maibé derepente nia hatan dehan ne’ebé nusa entaun ha’u hatan nusa, komesa ne’e sira asalta ona ha’u,” Leandro hatutan.

Suspeitu sira buka nia no hafoin ema ba sori ona mak sira dehan, baku nia tanba nia mak tolok Mari Alkatiri no Prezidente Repúblika Francisco Guterres Lu-olo.

“Maibé ha’u la hatene ha’u nunka tolok no ha’u tolok lideransa sira atu manán saida,” tenik Leandro.

Ho akontesimentu ne’e, Leandro afirma, sei la tolera no hakarak kontinua kazu ne’e ba prosesu, no nia husu karik nia tolok lideransa sira entaun hatudu evidénsia ruma.

Jornalista Jaime Pires

No More Posts Available.

No more pages to load.