Polisia Kaptura Joven Na’in Rua Na’ok Xina Nia Sasán iha Kolmera

by -1.618 views
Suspeitu SC no CD, Imajen Esp

(Reportajen Jaime Pires/Editor Mateus da Cruz)

Dili (Timor Post)-Ekipa patrulla hosi Polisia Nasionál Timor Leste, hodikalan, maizumenus oras tuku 12 ho balun, kaptura SC no CD, iha loja Xina nian, parte Kolmera, tanba na’ok loja na’in nia sasán.

“Sidadaun na’in rua tama iha loja Xina ida ninian iha area Kolmera hodi foti  sasán, iha tuku 10:00 loron depois tuir fali iha loron hanesan iha tuku 12:00 kalan, sira tama tan hodi foti tan sasán,” informa Komandante PNTL Munisípiu Dili, Superintendente Xefe, Henrique da Costa, bá jornalista sira iha Kaikoli, Tersa (08/03).

Nia hatete, polisia halo kapturasaun hafoin hetan kontaktu hosi loja na’in katak sira kaer ona suspeitu na’in rua ne’ebé maka na’ok sira nia sasán, nune’e ekipa patrulla kalan ba direta fatin akontesimentu hodi kaptura suspeitu na’in rua.

Joven na’in rua ho idade maizumenus 30 ba leten ne’e, agora daudaun iha hela sela detensaun Polísia Munisípiu Dili ninian hodi kumpre oras 72 molok aprezenta ba Ministériu Públiku, ho númeru prosesu 02/03/2022 substituisaun Vera-Krús

” Evidénsia sira ne’ebé suspeitu na’in rua foti mak hanesan, Televizaun Marka Polytron 24ins ne’e lima, Televizaun modelu Xina nian 62ins ne’e ida, AC modelu Panasonic, meziña, kadeira, fogaun, blander no mákina kafé ninia,” dehan tan.

Evidénsia sira ne’e ekipa investigasaun Vera-Krús ba foti iha fatin ne’ebé mak suspeitu sira lori ba rai iha ne’ebá, evidénsia sira ne’e agora iha ekipa investigasaun Vera-Krús nia liman hodi aprezenta hamutuk ho suspeitu na’in rua, molok sira kumpre oras detensaun 72 remata. . (Lee notisia seluk iha jornal Timor Post/asesu you tube Timor Post)

No More Posts Available.

No more pages to load.