Polísia Kaptura Joven Ida Ne’ebé Nia Sinelus Soe Hela iha Matebian nia Sorin

husi -48 views

DILI—Polísia Nasionál Timor Leste (PNTL) kaptura ona joven ida nakonu ho tattoo iha isin ne’ebé nia sinellus soe hela iha matebian nia sorin iha kampo laran Merkadu Taibessi, Dili.

Polísia halo kapturasaun ne’e iha kalan oras, tuku 12 liu, hafoin joven ida ne’ebé mate hafoin evakua husi fatin akontesimentu ba Hospital Nacional Guido Valadares (HNGV), Bidau, Dili, Segunda (23/12/2019), iha oras, maizumenus tuku 11 liu.

Hafoin kaptura polísia halo kedas investigasaun ba joven ne’e no nia rekoñese sinellus ne’e ninian. Polísia akompaña joven ne’e ba to’o iha matebian nia latan fatin hodi husu kona-ba tanba-sá nia soe hela sinelus iha fatin ne’e.

Iha invstigasaun joven ne’e dehan ba polísia sira katak, sinellus namdoras maka nia soe hela.

Tanba ho kondisaun lanu, polísia tula kedas joven ne’e ba karreta hodi lori ba hatama sela polísia Kaikoli, Dili hodi kontinua halo investigasaun.

Motivu husi insidente ne’e diskonfia joven lubuk ida inklui vítima hemu tua hamutuk, haksesuk malu to’o baku malu.

Liu minutu hira polísia to’o iha fatin akontesimentu hodi kaptura kedas joven ida ne’ebé deskonfia hanesan autor ba kazu ne’e.

Tuir sasin ne’ebé lakohi temi nia identidade ba Timor Post haktuir, vítima hanesan vendedor iha duni merkadu Taibessi.

Tuir observasaun Timor Post iha fatin akontesimentu haktuir, ema hotu iha merkadu laran pániku. Polísia pasa revista ba movimentasaun iha merkadu hodi evita krime seluk hafoin akontesimentu ne’e.

Jornalista Timor Post kontinua halo observasaun iha fatin akontesimentu no sei konfrma ho parte polísia no autoridade lokál sira kona-ba motivu lolo’os husi insidente ne’e no sei konfirma kona-ba identidade husi vítima rasik. (cao)