Polísia Kaptura JMDS tanba Violasaun Sexual, Vítima nia Aman mak Lori Suspeitu ba Uma

by -5.766 views
Imajen ne'e hatudu polisia halo kapturasaun ba suspeitu. Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Polísia Nasionál Timor-Leste (PNTL) liuhusi Servisu Investigasaun Kriminal Nasionál (SIKN) kaptura suspeitu ho naran inisiál JMDS tanba halo violasaun sexual hasoru labarik menoridade ho inisiál ESG.

Polísia ejekuta mandadu ho númeru Nuc 02/09.PNSIK iha loron Kinta (09/09/2021) hodi kaptura suspeitu iha Suku Bebonuk, Postu Administrativu Don Aleixo, Munisípiu Dili, oras, tuku 12:13 meiudia.

Tuir dadus ne’ebé Timor Post rekolla, vítima ho idade 14 no suspeitu ho idade 18.

Hafoin kaptura, polísia lori kedas suspeitu ba edifisiu PNSIK, Kaikoli hodi halo investigasaun molok tama sela durante oras 72 hafoin kontinua ba Ministeriu Públiku hodi bá tuir primeiru interogatoriu iha Tribunal Distrital Dili.

Inan husi vitíma, Palmira Goncalves haktuir, suspeitu koñese malu ho nia kaben no haree malu hanesan maun-alin rasik, entaun ba hela ho sira durante fulan ida ona.

Palmira Goncalves

“Tanba mai hela ho ami ha’u mós anggap hanesan ha’u nia ona mane hotu, tanba ha’u oan mane na’in rua de’it nia mai tan entaun ha’u kontente hanesan ha’u nia ona mane na’in-tolu ona,” Palmira ba Jornalista sira iha edefísiu PNSIK iha Kuartel Jerál PNTL Kaikoli, Dili.

Palmira haktuir kronolojia akontesimentu violasaun hasoru nia oan, iha loron 01/09/2021 nia oan feto boot nia oan moras sira lori ba klínika Lanut, entaun suspeitu aproveita kalan ne’e nia halo violasaun sexual.

Palmira haktuir, suspeitu dehan ba vítima katak bainhira akontese buat ruma nia prontu responsavel.

“Maibé labarik feto ne’e mós la ko’alia sai ba ami inan aman ida, entaun kalan ida tuir fali iha tuku 11 resin nia lori tan labarik feto ne’e sai tan ba eskola Raina da Paz kotuk, entaun ami hotu buka la hetan entaun bolu mak nia rona entaun haruka labarik feto mai uluk tiha uma, depois husu primeiru labarik feto bosok dehan ba toba ama ki’ik sira nia uma iha sorin, maibé ohin ba husu laiha, entaun jujur de’it ona dehan, suspeitu ne’e lori nia bá toba iha eskola Raina da Paz nia kotuk, no desde nia hamutuk tiha, dezde iha tangal satu kalan ne’e,” Palmira hatete.

Entretantu vítima dadaun ne’e lori ona bá uma mahon PRADET. (Lee notísia seluk iha Jornal Timor Post)

No More Posts Available.

No more pages to load.