Polísia Hapara Atividade Negósiu “Obralan” Aimutin no Kontinua Operasaun iha Dili

by -163 views

Jornalista Jaime Pires / Editór Noémio Falcão

DILI (Timor Post)—Komandu Polísia Nasionál Timor-Leste (PNTL) Munisípiu Dili liuhusi Unidade Trânzitu, Polísia Komunitária ho Taks Force halo operasaun ba movimentu ema no transporte públiku no atividade negósiu la nesesáriu sira inklui fa’an hena (obralan/Ob) iha Aimutin.

Autoridade sira haruka taka hotu loja sira ne’ebé mak la fa’an nesidade sira kona-ba hahan nian, sira kontinua halo patroliamentu iha Dili laran hodi kontinua fó informasaun kona-ba Konfinamentu Obrigatoriu ne’ebé aplika hahú husi 27 agostu to’o 02 setembru 2021.

Enkuantu ekipa Operasaun mós kontinua mai hapara negosiante sira ne’ebé mak faan obralan iha Aimutin, Ponte Foun no mós iha Tasi-Tolu.

Observasaun Timor Post iha terenu nota autoridade sira halo sosializasaun hodi fó informasaun ba kominidade sira ne’ebé mak movimentu iha kapitál Dili so permite de’it ba ba hola nesesidade bázika maibé tenke uza máskara no distansiamentu sosiál.

Maski Negosiante sira tau bee no sasán higene sira iha oin maibé PNTL haruka taka hotu tanba iha rezolusaun governu ne’e deside loja no Negosiante ambulante sira ne’ebé mak faan nesesidade kona ba hahán ne’e bele loke.

Fó hanoin fali katak iha Sesta (27/08) dedeer ne’e ekipa PNTL Dili halo uluk ona  operasaun ba área Komoro hodi fó informasaun no hapara loja sira ne’ebé mak la fa’an sasán kona-ba ai-han nia taka hotu.

Enkuantu orsida loraik ekipa sei kontinua ba halo operasaun ba parte Bekora nia hodi fó informasaun no haruka taka hotu loja sira ne’ebé mak la fa’an kona-ba ai-han bázika nia.

Negosiante sira kopera ho medida sira ne’ebé autoridade seguransa sira foti maske balu kontra tanba fo impaktu ba sira nia nesesidade lorloron.

No More Posts Available.

No more pages to load.