Polísia Detein Diretór Kompañia Telemor no Elite Computer tanba hala’o Atividade Ilegál

by -79 views

Timor Post (24/11/2020)-Komandu Polisia Nasionál Timor-Leste (PNTL) liu hosi Servisu Investigasaun Kriminál (SIK) ezekuta mandadu buska no detensaun no apreensaun ba sasán evidénsia ba CEO ka Diretór Jerál Kompañia Telekomunikasaun Telemor ho inisiál (TVB) no Diretór Kompañia Eleite Computer ho inisiál (DP).

Suspeitu na’in rua SIK detein tuir despaxu Tribunál Distritál Dili  (TDD)  ho NUK 0166/20/PSIC hodi halo mós primeiru julgamentu iha Tribunál Dili.

Suspeitu CEO Kompañia Telemor TVB, SIK halo detein iha ninia servisu fatin Telemor, Timor Plaza CBD 4, andár tolu  iha oras  tuku 15:00.

Hafoin halo tiha detensaun, ekipa SIK halo kedas esplikasaun ba konteúdu karta detensaun hosi Tribunál nian ba suspeitu no ekipa funsionáriu tomak, inklui halo investigasaun ba sistema ka data center  no sistema Call Center Telemor nian iha andar rua CBD-2.

Entretantu, suspeitu DP Diretór Kompañia Elite Computer, SIK halo detensaun iha ninia servisu fatin Colmera Dili, iha oras 14:45.

Hafoin halo tiha detensaun, ekipa SIK hamutuk ho ekipa Technology Information (IT)  halo apreensaun  hodi husu password ba kontrolu ba sistema date center ne’ebé deskonfia durante kompañia Elite Compute utiliza hodi halo koneksaun sistema rede satélite ilegál hosi Atambua-Indonézia nian.

Ezekusaun mandadu buska detensaun hala’o direita hosi Komandante Servisu Investigasaun Kriminá (SIK), Superintendente Xefe, José Maria Neto Moc akompaña hosi ekipa investigadór SIK no hetan apoiu hosi Servisu Informasaun Polisia (SIP).

Suspeitu na’in rua, TVB no DP deskonfia halo korrelasaun servisu ba malu hodi fasilita utiliza internet ilegál ne’ebé uza satélite Indonézia nian ho kapasidade 600MBS ne’ebé fasilita ba liña ministériu sira inklui Komandu Polisia Nasionál Timor-Leste (PNTL).

Impaktu hosi servisu korrelasaun entre suspeitu na’in rua hodi fasilita servisu internet ilegál ne’ebé Servisu Investigasaun Kriminál deteta hahú kedas hosi tinan 2012 mai too tinan 2018 fó prejuizu ba Estadu Timor-Leste lakon osan barak.

Ho hahalok suspeitu Nain rua ne’e, Ministériu Públiku akuza suspeitu rua komete kazu burla informátika no kazu fraude fiskál.

Entretantu durante ne’e Kompañia Elite Komputadór maka manan konkursu halo koneksaun internet ilegál hodi halo korrelasaun servisu ho suspeitu TVB, maibé parte Governu Timor-Leste liu hosi Autoridade Nasionál Komunikasaun (ANC) ne’ebé hetan fasilidade priviléjiu hosi Estadu Timor-Leste la halo kontrolu ba servisu kompañia rua ne’ebé fó prejuizu ba estadu Timor-Leste.

Tuir dadus ne’ebé Timor Post rekolla, durante Kompañia Elite Komputadór servisu hamutuk ho Komandu Jerál PNTL hodi halo ligasaun internet koneksaun ba sistema kontrolu Closed Circuit Television (CCTV) iha sidade Dili no postu integradu liña fronteira terrestre.(Jornalista: Jaime Pires)

No More Posts Available.

No more pages to load.