DILI (Timor Post.com)—Relasiona transporte públiku liuliu Bemo 01 to’o 010 lakohi tula pasajeiru iha sidade Dili, tanba kondutór sira preokupa implementasaun Dekretu-Lei N.° 2/2003, Diresaun Nasionál Transporte Terestre (DNTT) seidauk tuir dalan konstituisional.
Tu’ir kondutór Fernando hatete, lamenta tebetebes implementasaun lei ne’ebé DNTT anúnsiu ba públiku liuliu ba rodaváriu sira, katak estudante selu 0,15 centavu no ema funsionáriu 0,25 centavu, maibé realidade la aplika iha pratika.
“Ami husu ba Ministériu relevante, tenke utiliza lei transporte iguál, liuliu ba rodaváriu hothotu, tanba lei ne’e vale ba ema hotu la’ós ema ida de’it.” Dehan Kondutór Fernando da Silva ba Timor Post iha Komoro, Kuarta-feira (04/10/2023).
Nia dehan, objetivu prinsipál ami lakohi halai, tanba mina folin sa’e, ami komprende katak presu mundiál, maibé lei transporte públiku daudaun implementa laiha motivu ida efetiva ba ami kondutór sira.
Nia afirma, rodaváriu liuliu bemo sira, reben ne’ebé ami tau iha vidru sira, atu satan netik loro manas ba pasajeiru sira, ne’e mós PNTL sira hasai hotu, maibé karreta reben metan sa’e kintu kantu lá hasai lei ne’e vale de’it ba Bemo sira ou hanusa.
“Ida ne’e parte relevante tenke hare no hadia. Hakarak aplika labele ba de’it Bemo sira maibé vale ba transporte hotu. Bainhira vale deit ba bemo signifika lei ne’ebé DNTT aplika lá tu’ir dalan konstitusionál”. Nia rekomenda.
Tanba ne’e, autoridade relevante DNTT, atu funsiona didi’ak lei refere, nune’e bele normaliza fila-fali kondisaun transporte iha sidade Dili.
Iha parte seluk estudante, Universidade Nasionál Timor Lorosa’e (UNTL), Januário Fernandes Freitas lamenta, implementasaun lei DNTT laiha funsionalidade di’ak ba lei refere, liuliu lei transporte públiku.
Tanba mina folin sa’e, implementasaun lei transporte ka roda váriu nian la la’o, entaun impaktu kedas ami estudante sira nia estudu ka eskola.
“Ami estudante dependénsia ba karreta bemo husi 01 to’o 010 sira ne’ebé halai iha Dili laran, maibé lá halai hotu, oinsá ho ami nia estudu”. Nia haktuir.
Tanba ne’e husu ba governu liuliu autoridade DNTT atu normaliza fali situasaun, hodi valoriza didi’ak lei transporte nian.
2,082 total views, 12 views today
Bele hare Video Seluk :
Subscribe to Timorpost
