DILI (timorpost.com) – Família husi matebian Bernardo de Jesus Lopes, ne’ebé mate iha sela detensaun Polísia Nasionál Timor-Leste (PNTL) Kaikoli, ezije Polisia Sientífiku Investigasaun Kriminál (PSIK), atu aselera prosesu investigasaun.
Inan ba matebian, Rezinha de Jesus Soares, hatete ohin sira mai iha edifísiu Polisia Sientífiku Investigasaun Kriminál (PSIK), atu ezije PSIK aselera investigasaun.
“Ami família mai iha ne’e atu ezije Polisia Sientífiku Investigasaun Kriminál, aselera lalais investigasaun ba ha’u-nia oan Bernardo de Jesus Lopes nia mate iha sela detensaun Komandu PNTL Munisípiu Dili,” nia hateten hafoin hasoru PSIK, Segunda (16/01).
Nia dehan, akontesimentu ne’e tanba tama ona ba iha fulan lima, maibé rezultadu investigasaun seidauk iha ba família.
Ina ba Matebian haktuir, sira família hasoru tiha parte Polisia Sientífiku Investigasaun Kriminál, sira fó resposta katak prosesu la’o hela.
“Ohin ami família nia ezijénsia ba Polisia Sientífiku Investigasaun Kriminál, maibé sira resposta dehan lei no justisa kona-ba matebian Bernardo de Jesus Lopes, ne’ebé mate iha sela ne’e la’o nafatin hela, parte PSIK dehan hein tan loron 30, hafoin fó sai rezultadu investigasaun,” nia konta.
Tanba ne’e, nia parte hanesan inan ba matebian Bernardo de Jesus lopes, nia sei hein tan loron 30, maibé karik rezultadu investigasaun laiha, nia hanesan inan sei kontinua ezije ba PSIK.
“Ha’u sei ezije to’o hetan rezultadu, tanba ha’u-nia oan ema umanu ida, mate iha Polisia nia liman,” nia lamenta.
Ikus nia dehan, sira ezije PSIK, tanba momentu akontese kazu ne’e, família husu Polisia Sientífiku Investigasaun Kriminál, mak halo investigasaun ba matebian Bernardo de Jesus Lopes nia mate iha sela detensaun Komandu PNTL Munisípiu Dili.
Iha fatin hanesan Investigadór Xefe, Floriano Serano, informa kazu iha sela ne’e, Investigadór titular, sei iha prazu loron 30 ba kazu refere.
“Kazu sela ne’e, ami-nia investigadór Titular kona-ba kazu refere, prazu 30 dias, atu konklui prosesu ne’e, ita investigadór Titular sei halo relatóriu ba iha Ministériu Públiku (MP), tanba ne’e kazu sela ne’e iha hela prosesu investigasaun nia laran,” nia dehan.
Nia hatutan, hafoin Investigadór Titular halo relatóriu ba iha Ministériu Públiku, depois rezultadu prosesu investigasaun ba kazu ne’e, hafoin parte Polisia Sientífiku Investigasaun Kriminál submete prosesu ba iha Ministériu Públiku.
“Tanba ne’e, ami husu família matebian Bernardo de Jesus Lopes, prosesu investigasaun durante 30 dias, ami la bele ko’alia konteúdu ba prosesu ne’e, tanba Investigadór Titular sei elabora prosesu durante 30 dias,” nia hateten.
Nune’e mós nia hatete, maski Investigadór Titular remata investigasaun ba kazu refere, durante loron 30, maibé sira la bele ko’alia konteúdu prosesu ba família sira, maibé sira sei remete ba iha Ministériu Públiku, hafoin Ministériu mak sei halo akuzasaun ba autór ne’e, depois haruka iha Tribunal, maibé sei la fó sai rezultadu Investigasaun, tanba segredu justisa.
1,442 total views, 6 views today
Bele hare Video Seluk :
Subscribe to Timorpost
