DILI (timorpost.com) – Komandu Polisia Nasionál Timor-Leste (PNTL), husi Seksaun Polisia Tránzitu Munisípiu Dili, prende motorizada 172 ho dokumentu hamutuk 35.
Komandante PNTL Munisípiu Dili, Superintendente Xefi, Henrique da Costa, hatete durante loron neen semana ida hahú iha loron 08 to’o 14 fulan Setembru tinan ne’e, Polisia Tránzitu prende motorizada 172 ho dokumentu hamutuk 35 iha Munisípiu Dili.
“Durante Semana ida, ita konsege prende motorizada hamutuk 172 ho dokumentu transporte hamutuk 35, tanba kontra dekretu lei kódigu estrada númeru 6/2003,” nia hateten iha knaar fatin PNTL Kaikoli Dili, Kuarta (14/09).
Nia dehan, aktividade operasaun konjunta pasa revista ba transportes karreta ho motor iha Kapitál nasaun kontinua no ba motorista sira ne’ebé simu ona bilete infrasaun tenke kumpre ba selu iha banku, hafoin mai entrega resibu ba Polisia Tránzitu hodi foti fali karreta ho motor ne’ebé sira prende.
“Operasaun hanesan pasa revista ne’e, ita nafatin kontinua, tanba ita hetan apoiu husi Polisia Tránzitu Nasionál apoiu PNTL Munisípiu Dili hamutuk ho forsa rezerva hodi halo pasa revista ba karreta ho motor Kapitál Dili,” hatete nia.
Nia hatete, ba kondutór karreta mikrolete ho taxi tenke uza uniforme ho dokumentu kompletu no motorista sira mós tenke monta sapa matrikula, asesores sira seluk inklui karta kondusaun tenke ativu.
“Ita haraka ema hotu respeita ba regra lei kódigu estrada, tanba karreta ho motor balun kalan movimentu sira la monta lampu ho asesores transportes nian laiha hodi hamosu asidente iha estrada públiku,” nia hateten.
Tanba ne’e, PNTL halo opersaun mak hetan karreta ho motor lampu la di’ak no la tau asesores kompletu ho dokumentu mate, polisia sei aplika bilete ba infrator sira atu ba selu iha banku, depois haruka kedas sira hadi’a lampu no monta asesores transportes.
“Operasaun hanesan ne’e ita sei kontinua tantu check point no tantu operasaun motorizada sira ne’ebé parte zebra nian no mós motorista no zebra karreta nian, halo movimentu iha area Kapitál hodi haree dala-ruma ema balun para la tuir regras ita hetan aplika kedas multa ba sira,” nia hakotu.
1,513 total views, 3 views today
