DILI (timorpost.com) – Polisia Nasionál Timor-Leste (PNTL) liuhusi komandu Munisípiu Dili, horisehik (11/09), kaptura ona suspeitu na’in-3, ne’ebé deskonfia provoka malu liuhusi Media Sosiál (MedSos).
Komandante Munisípiu Dili, Superintendente Xefe Polisia Henrique da Costa, hatete iha Semana kotuk ema hotu akompaña video viral ida iha Media Sosiál, joven sira halo gravasaun no provoka malu iha parte Media Sosiál nian.
“Ita orienta parte servisu informasaun Polisia ho mós ita-nia parte investigasaun nian para identifika provokadór sira liuhusi Media Sosiál ne’e, Nune’e, horisehik ita konsege identifika no bolu ona suspeitu nain-3 mai iha Komandu Munisípiu Dili, Ita koordena fila fali ba iha parte investigasaun Kriminál Nasionál hodi entrega fali suspeitu ne’e ba iha investigasaun Kriminál Nasionál, hodi halo prosesu,” nia hateten iha knaar fatin, Segunda (12/09).
Nia dehan, suspeitu na’in-tolu ne’e sira-nia parte ba halo kapturasaun joven na’in-rua iha area Vila-Verde no ida seluk iha area Mascarinha, suspeitu nain-tolu ho inisiál BD, SC ho IDSL.
“Tanba ne’e, ita husu ba iha utilizadór Media Sosiál sira atu uza ne’e ba iha pontus pozitivu nian,” nia informa.
Nia dehan, Tenke kuidadu informasaun ka buat hirak ne’ebé sidadaun sira fahe iha Media Sosiál, maibé nia finalidade ne’e sai fila fali provokadór no kria fali estabilidade.
“Ita-nia kometimentu ita nafatin servisu hamutuk ho parte investigasaun kriminál Nasionál nian no servisu informasaun Polisia no mós parte Polisia Servisu Investigasaun Kriminál (PCIC) nian, atu nune’e hodi buka no identifika ID falsu no ema hirak ne’ebé uza Media Sosiál,” nia hateten.
Nia haforsa tan, ema ne’ebé uza ID falsu ne’e atu hato’o informasaun ne’ebé laloos iha Media Sosiál.
Ikus liu nia repete, horisehik sira identifika ema na’in-rua ona, tanba ne’e husu ba sidadaun sira ne’ebé karik hatene ema uza ID falsu komunika mai iha parte Polisia, atu nune’e bele ba halo kapturasaun.
1,710 total views, 6 views today
