DILI (Timor Post)-Ekipa Konjunta kompostu husi Polisia Nasionál Timor-Leste (PNTL), Komisaun Anti Korrupsaun (KAK), Diresaun Nasionál Transporte Tereste (DNTT), Patrimóniu Estadu ho Funsaun Públika, halo operasaun iha Area Palásiu Governu nian, konsege prende karreta Estadu 10 no motorizada Estadu 4.
Tuir Komandante Polisia Munisípiu Dili, Superintendente Xefe Henrique da Costa, hatete horisehik loron 14 fulan Jullu tinan 2022, ekipa konjunta husi Tránzitu Munisípiu Dili, Tránzitu Nasionál, DNTT no mós KAK halo pasa revista konjunta ba iha Karreta ho Motor Governu nian ne’ebé sirkula iha fora husi servisu nian.
“Ita halo pasa revista iha area Palásiu Governu nian sorin, no konsege prende evidénsia karreta Governu nia hamutuk 10 no Motor Governu nian hamutuk 4, no mós inklui dokumentu 3,” nia hateten iha Komandu Munisípiu Dili, Sesta (15/07).
Nia dehan, evidénsia sira ne’e agora lori hotu ba iha patrimóniu Estadu, depois iha pasta revista ne’e mós identifika katak motorista sira balun karta kondusaun mate no iha mós balun hanesan dokumentu karreta ho motor nia mate, entaun husi parte tránzitu Munisípiu Dili nian, halo kedas billete multa ba sira, atu nune’e sira ba selu iha Banku.
“Iha prosesu seluk, husi parte KAK nian no mós patrimóniu Estadu nian mak atende, husi ita-nia parte tránzitu Munisípiu Dili nian, mak hodi aplika multa ba iha karreta ho motor ne’ebé dokumentu mate ou karta kondusaun laiha ka mate.
Nia informa, operasaun hanesan ne’e, sei kontinua tantu iha fim de semana no loron feriadu nian, iha oras ne’ebé la servisu, ida ne’e iha ona koordenasaun ho parte KAK, DNTT no tránzitu nian para halo operasaun hanesan ne’e sei kontinua.
“Mais, ita-nia envolvimentu parte ita-nia servisu sekretaria nian mós iha ne’ebá para observa,” nia hateten.
Ikus nia dehan, kona-ba uniforme ne’e depende ba instituisaun sira ida-idak, konserteza husi parte PNTL nian, tenke uza farda.
1,425 total views, 3 views today
