DILI (Timor Post)-Polísia Nasionál Timor-Leste (PNTL) liuhusi Unidade Patrullamentu Fronteira (UPF), Kompañia Postu Mozon, asegura sasán kultura ne’ebé timoroan sira tenta halo tranzasaun ilegál iha liña fronteira.
Komandante UPF, Superintendente Euclides Belo, deklara sasán kultura hirak ne’e UPF hetan liuhusi operasaun rutina iha fronteira terrestre Timor-Leste ho Indonézia.
“Ohin dadeer tuku 3:40, ita-nia ekipa patrulla UPF Postu Mozon halo operasaun iha area Lessu Maliana no konsege asegura sasán kulturál timór nian, osan mean, ai-moruk inklui motor tipu KLX 2 ne’ebé sidadaun sira uza no tenta halo tranzasaun ilegál iha área fronteira. Maibe sasán hirak ne’e sei deskuñesidu tanba nain halai tama fali ba area Indonézia no ita-nia membru sira la konsege kaptura”, dehan Euclides Belo, ba jornalista sira liuhusi via telfone, Kuarta (13/07).
Nia dehan, sasán hirak ne’e asegura ona iha kompañia Alfa, Tunubibi hafoin sei halo auto aprensaun hodi asegura iha Komandu PNTL Munisípiu Bobonaro hodi Prosesa kontinuasaun ba iha Ministériu Públiku.
“Evidénsia ne’ebé ita rekolla mak hanesan Belak Mean 252, Belak Mutin 94, Belak Mean Kiik 477, Belak Mutin Kiik 152, Lafa Mean 58, Lafa Mutin 24, Kaebauk 2, kelu/keke 10, Maskana 60, Morten 165, Mas Padi 19, Brinkus 124, korente mas padi 52, Mas Mean 5. Iha mós Ai-moruk balun hanesan Paramex 494, strip supertetra 195 Strip, puyer/bintang 180, Dexanltarsen Dexa 400, Strip Inza pakote 124, Konidin pakote 2046 no objeitu hirak ne’e priense ona auto aprensaun hodi asegura iha Kompañia”, nia relata.
Euclides hatete, oras ne’e membru UPF nafatin halo vizilansia makas iha fronteira kontribui ba seguransa públika nune’e bele halo prevensaun hodi garante liña fronteira sai fatin seguru ba ema hotu.
1,340 total views, 3 views today
