PNTL Manufahi Destaka Membru Polísia 131 Hodi Asegura Festa Páskua

by -208 views
Komandante Komandu Polísia Munisípiu Manufahi, Superintendente, Joni Viana das Regras,

Manufahi (Timor Post)—Polísia Nasionál Timor Leste Munisípiu Manufahi sei destaka ninia membru hamutuk 131 hodi asegura festa Páskua iha tinan ida ne’e bele la’o ho di’ak.

“iha Manufahi efetivu ne’ebé ami prepara ba festa Páskua hamutuk ema na’in atus ida tolu nulu resin ida (131) hodi destaka ba fatin ne’ebé determina ona”, informa Komandante Komandu Polísia Munisípiu Manufahi, Superintendente, Joni Viana das Regras,  iha nia kna’ar fatin, Segunda (11/04).

Nia hatete, komandu munisípiu sira iha Timor laran simu ona orientasaun husi komandu jerál PNTL atu asegura festa Páskua, tanba ne’e PNTL Manufahi prontu ona atu asegura festa Páskua tinan ne’e bele la’o ho hakmatek.

“Ami prontu asegura no garante selebrasaun festa Páskua ba tinan ida ne’e iha Manufahi ho ambiente hakmatek no seguru”, nia deklara ba jornalista

Daudaun ne’e komandu oriénta ona komandante eskuadra polisia Postu Administrative Alas, Turiskai, Fatuberliu no eskuadra Postu Adminsitrative Same Villa atu asegura sarani sira ba misa iha selebrasaun Páskua.

Iha oportunidade ne’e nia apela ba povu no sarani sira iha Manufahi atu nafatin hametin unidade hodi haburas pas no estabilidade.

“Apela mós ba povu Manufahi atu labele konsumu alcohol  iha festa páskua nune’e hodi evita perturbasaun ne’ebé la espera tanba Jesus Kristu terus tanba ita nia sala”, nia husu. (Lee notisia seluk iha Timor Post/Asesu You Tube Timor post)

No More Posts Available.

No more pages to load.