PNTL infrenta Problema Transporte Durante Festa Natal no Tinan Foun

by -365 views
Vise-Ministru Interior (V-MI) António Armindo

Jornalista Jaime Pires / Editór Noémio Falcão

Dili (Timor Post)—Vise-Ministru Interior (V-MI) António Armindo, husu Patrimoniu Estadu atu apoiu karreta ba Komandu Polísia Nasionál Timor-Leste (PNTL), hodi halo operasaun durante loron boot Natál no Tinan Foun.

“Agora ne’e la’ós tránzitu de’it mak karreta at hodi halo operasaun ka halo servisu iha selebrasaun natál tinan foun agora, maibé PNTL hotu-hotu infrenta, tantu Munisípiu Dili no mós Munisípiu sira seluk hotu inklui mós eskuadra no postu sira hotu,” V-MI António informa ba Jornalista sira iha Komandu PNTL Munisípiu Dili, Kaikol, Sesta (17/12/2021).

Nia haktuir, simu ona karta husi Komandu Jerál PNTL, no karta manda ona ba Patrimoniu Estadu atu bele haree karreta sira ne’ebé mak diaponivel hodi haruka ba Munisípiu hodi PNTL bele uza halo servisu operasaun durante selebrasaun Natál no Tinan Foun.

António dehan tan, horisehik mós koordena ona ho Ministeriu Finansas hodi hatun despaixu lalais ba karreta sira ne’ebé mak diaponivel hodi haruka ba Munisípiu sira hodi uza.

“Ha’u nia Ministeriu rasik mós sei oferese Karreta sira ne’ebé mak diaponivel haruka ba Komandu PNTL hodi sira bele uza halo servisu durante loron boot ne’e,” António dehan.

Tanba ne’e, governante ne’e haktuir, nia parte hato’o ona iha Parlamentu Nasionál, no komisaun B mós aprova ona proposta adisional hodi sosa karreta iha tinan oin, hodi bele responde ba PNTL nia preokupasaun ne’e.

No More Posts Available.

No more pages to load.