PN Simu Karta Hasai Imunidade Deputadu Arão Noe

by -493 views
Prezidente Parlamentu Nasionál, Aniceto Longuinhos Guterres Lopes

(Reportajen Jaime Pires/Editor Mateus da Cruz)

DILI (Timor Post)- Parlamentu Nasionál (PPN), simu ona karta notifikasaun husi Ministériu Públiku (MP), atu hasai deputadu bankada CNRT, Arão Noe nia Imunidade, relasiona ho kazu abuzu podér.

“Sim iha pedidu husi Ministériu Públiku, loloos sei iha faze inkeritu seidauk to’o iha julgamentu tribunal, liga ho kazu abuzu de podér,” dehan Prezidente Parlamentu Nasionál, Aniceto Longuinhos Guterres Lopes, ba Jornalista sira iha Parlamentu Nasionál, Kinta (12/05).

Nia hatete, kazu ne’e Komisaun Anti Korrupsaun (KAK) halo hotu ona, antes atu haruka fali ba iha Tribunal Rekursu atu halo akuzasaun tenke halo fali inkéritu.

“Tanba ne’e mak Prokuradór Jerál husu mai Parlamentu Nasionál atu foti imunidade Deputadu Arão Noe ninian, tanba Parlamentu Nasionál kuandu atu foti deputadu ida ninia Imunidade kuandu akuzasaun prontu hotu ona no julgamentu atu la’o ona mak Juis sira husu Parlamentu atu hasai imunidade, maibé Deputadu Arão nia ne’e seidauk no sei iha faze inkéritu,” nia hatete.

Tanba ne’e agora la hanesan baibain, entaun nia parte sei konfirma fali ho asesór jurídiku sira hotu hafoin avansa ba plenária atu foti ka la foti ba imunidade Deputadu Arão Noe ninian.

“Kazu abuzu podér ne’e foin daudaun mak nia komete, momentu nia sei sai hanesan Prezidente Parlamentu Nasionál ne’e mak akontese,” nia hatete.(Lee notisia seluk iha Timor Post/Asesu You Tube Timor post)

No More Posts Available.

No more pages to load.