PN La Aprova Pedidu Urjénsia ba Alterasaun LOJF, Koligasaun Foun Prefere Orsamentu ba Atende Situasaun Emerjénsia

husi -76 views

DILI—Parlamentu Nasionál (PN) la aprova pedidu urjénsia husi governu lideradu Primeiru Ministru Taur Matan Ruak kona-ba alterasaun datoluk Lei Orsamentu Jestaun Finanseiru (LOJF) hodi fó biban ba governu foti osan husi fundu petrolíferu.

Diskusaun iha plenária PN, Kuarta (25/03/2020), maioria bankada parlamentár subliña alterasaun LOJF presiza iha diskusaun klean, saida mak emerjénsia liu maka orsamentu atu governu bele atende situasaun emerjénsia.

Rejultadu votasaun ba LOJF, kontra 33,a favor 31 no abstensaun 0. Ho rejultadu ne’e mesa PN sei haruka fila pedidu alterasaun datoluk LOJF ba komisaun atu halo relatóriu mak foin ajenda normal hikas iha plenária.

Deputadu husi CNRT, PD, KHUNTO, UDT, FM no PUDD husu ba governu atu aprejenta mak orsamentu atu hetan aprovasaun hodi atende situasaun emerjénsia iha rai laran liuliu virus corona (COVID-19) no problema inundasaun. (cao)