PM Taur Vasina Covid-19, PR Lu-Olo La Partisipa

by -131 views
Vasinasaun-Primeiru Ministru (PM), Taur Matan Ruak ho Membru Governu sira hein hela atu simu vasinasaun Astrazeneka iha Sentru Saúde Bairru Formasa, Kuarta, (7/4/2021)

(Reportájem Jaime Pires/Editor Suzana Cardoso)

DILI (Timor Post) – Hafoin liu tiha loron rua AstraZeneca, (Segunda, 5/4/2021) to’o iha Airoportu Nicolau Lobato, Primeiru Ministru (PM), Taur Matan Ruak ho nia aliadu  Governu Konstitusionál daualu simu ona vasina.

Tuir observasaun Timor Post, Kuarta, (07/04/2021) iha Sentru Saúde Bairru Formoza, orgaun soberanu PM, Taur ne’ebé asumi mós kargu nu’udar Ministru Interior, Prezidente Parlamentu Nasionál, Aniceto Guterres, Prezidente Tribunal Rekursu, Deolindo dos Santos, inklui membru governu daualu simu ona vasinasaun AstraZeneca.

Maibé Prezidente Repúblika, Francisco Guterres Lu-Olo maka lapartisipa hodi simu vasinasaun. Simu vasinasaun AstraZeneca, Arsebispu Metropolitana Dili, Don Virgílio do Carmo da Silva no Premiadu Nobel da Paz, José Ramos Horta.

Orgaun soberania, hamutuk ho membru governu sira seluk sai Timoroan dahuluk ne’ebé simu vasina AstraZeneca hodi lansa Kampaña Vasinasaun iha Timor-Leste.

“Ohin simu vasina ne’e normal. Ha’u ko’alia ho ema barak iha mundu. La’ós de’it iha ne’e. Ha’u ko’alia ho kolega balun iha Inglatera. Katak, vasina ida sira simu iha Inglatera, mak ne’e duni,” hateten Ramos Horta ba Jornalista hafoin remata simu vasina Astrazeneka kontra Covid-19.

Dehan Ramos Horta, iha Inglatera ema juta 30 resin mak simu ona vasina. Tanba ne’e nia ko’alia ho ema sira ne’e katak sira balun simu tan oan vasina dala rua maibé normál hela. Maske dala ruma bele hetan isin manas no isin moras. Maibé ne’e normal. Tanba vasina sempre hetan reasaun.

Eis Prezidente Repúblika ne’e, husu ba populasaun atu wainhira governu hahú halo vasina hotu-hotu tenke simu. Vasina daruak sei monu iha loron Ualu fulan Juñu tinan ida ne’e.

“Bainhira simu ona vasina daruak mak bele hateten ninia imunidade ne’e aumenta to’o 80% no 90%. Maibé agora seidauk. Tanba ne’e husu ba povu tenki rona ema sira ne’ebé mak responsbiliza iha lideransa no tekniku sira saúde no Organizasaun Mundial Saúde. Rona Amu Bispu sira hotu,” husu Ramos Horta.

Ho diplomasia Ramos Horta hateten, Amu Bispu rasik halo desizaun taka misa. Maibé matenek balun hakerek iha Facebook dehan buat ne’e bosok. Entaun sira konsidera, Amu Bispu no Amu Papa sira mós bosok, Primeiru Ministru no Prezidente sira iha mundu ne’e bosok hotu tanba iha mundu ne’e hotu-hotu afeta.

“Maun Boot Xanana rasik mós tau maskara, nia la hatete dehan nia la fiar”, tenik Ramos Horta hodi husu ba sidadaun hothotu tenki fiar lideransa, sientista no mediku no OMS katak Covid-19 iha duni. Labele fiar matenek balun ne’ebé hakerek iha Facebook.

Entretantu vasina doses rihun 24 dahuluk to’o iha Timor-Leste iha Segunda, (5/4/2021) tuir kalendáriu governu nian sei hala’o uluk ba pesoál liña frente, no Primeiru Ministru husu Prezidente da Repúblika Francisco Guterres maka taka. Maibé depende ba rekomendasaun hosi médiku.

Tuir dadus Timor-Leste rejistu kazu mate dahuluk afeita hosi Covid-19 iha Tersa, (6/4/2021), kazu ativu 467 no total kazu akumuladu hosi inisia pandemia iha Timor-Leste hamutuk 778.(***)

 

No More Posts Available.

No more pages to load.