PM Taur Husu MOP Investe iha Ekipamentu hodi Hakman Servisu

husi -21 views

Timor Post (05/03/2021)—Primeiru Ministru (PM), Taur Matan Ruak husu ba Ministru Obras Publikas (MOP) Salvador Pires atu investe ba ekipamentu hodi hakmaan servisu.

Matan Ruak hato’o ne’e tanba hare ba ekipamentu servisu MOP nian sente koitadu.

“Ha’u hanoin loos Obras Públika ninia ekipamentu teste ne’e, ha’u imajina estrada pedasuk metru (100) sira halo oras rua la hotu, signifika nia halo estrada diresaun hosi Dili ba to’o iha Baukau ita bele lori tempu naruk, entaun ha’u promete ba iha Ministru Obras Publika no laboratóriu hotu tenke halo investimentu hadi’a sira nia ekipamentu para halo sira nia servisu ne’e kmaan liután no presta servisu kualidade ida ba emprezáriu sira no mós ba estadu”, hatete Primeiru Ministru Taur Matan Ruak, bainhira foti matéria baze alkatraun iha estrada Balidi, Sesta (05/03).

Entretantu Ministru Obras Publika (MOP), Salvador Pires rekunese, atu garante kualidade investimentu tenke iha aparellu iha servisu laboratóriu nia tenke sufisiente atu asegura inspesaun ba kualidade hosi investimentu ne’ebé mak halo.

Hodi haktuir katak tinan kotuk MOP konsege halo akizisaun ba ekipamentu ida teste dijitál ba kamada estrada nian hosi indonézia no nia operasaun mós presiza kapasitasaun hosi fornesidora rasik, maibé tanba Covid-19 la konsege.

Membru Governu ne’e adianta agora atu halo fali aranjamentu foun ida hodi bele fó lisensa atu bele hatama mai hodi submete ba protokolu saúde nian, hodi komesa halo ona treinamentu ka kapasitasaun ba tékniku laboratóriu, hodi bele opera mákina ne’e hodi kontrola kualidade estrada.

Jornalista : Jaime Pires
Editor : Mariano Martins