PM Taur ho Don Virgílio Inaugura Igreja SAKROJES

by -598 views
Foto TP: Maria Lizia

Jornalista Jaime Pires / Editór Noémio Falcão

Dili (Timor Post)—Primeiru Ministru (PM) Taur Matan Ruak ho Arsebispu Metropolitana Dili, Don Virgílio do Carmo da Silva inaugura Igreza Sagradu Korasaun de Jesus (SAKROJES)-Bekora.

Serimónia inaugurasaun hala’o iha loron Domingu (21/11/2021).

Iha omília, Don Virgílio hatete, tinan ida ne’e sarani Igreja Bekora selebra loron festa espesial  tebes ne’ebé mak kada tinan sei labele repete.

Foto TP: Maria Lizia

“Ohin sarani Bekora selebra festa Kristu Liurai ho espesial tebes ne’ebé mak kada tinan sei labele repete tan dala ida, tanba Inaugura Igreza foun,” Don Virgílio hatete.

Don Virgílio dehan, loron-loron ema hotu la’o ba mai iha Bekora sempre haree ba Igreja Bekora katak bainhira mak hotu maibé ikus mai konsege duni finaliza.

Don Virgílio mós husu ba sarani sira ho inaugurasaun igreja foun ida ne’e atu prepara-an ba Natál Tinan foun, no husu mós haluha ona hahalok tuan ho ódiu vingansa sira.

Iha serimonia inaugurasaun ne’e hetan partisipasaun másimu husi sarani Parokia Bekora no hetan mós partisipa husi espoza Primeiru Ministru Taur Matan Ruak, Isabel da Costa Ferreira, Vise-Prezidente Parlamentu Nasionál, Maria Angelina Sarmento no Deputadu husi Bankada Partidu Demokrátiku (PD), António da Conceição.

Serimonia inaugurasaun ne’e sarani sira halo ho serimonia kultura hanesan Bidau baku babadok inklui mós Ami Bispu Don Virgílio hatais kultura hodi husik Manu Pombu.

Hafoin ida ne’e Ami Bispu hasai fali kultura hodi hatais fali batina hodi fó bensa ba ingreza foun ne’e, no asina plaka hamutuk ho Primeiru Ministru, Taur Matan Ruak, inklui mós koa fita. Hodi kontinua kedas entrega Xavi ba Ami Parokia Domingos da Silva ‘Maubere’.

Enkuantu konstrusaun ba Igreja Bekora foun ne’e hahú iha fulan Novembru tinan 2015 ne’ebé mak Igreza Bekora sei lidera husi Amu Guilermino da Silva hanesan Amu Parokia Bekora no ohin halo ona inaugurasaun.

Konstrusaun ba Igreja foun Sagradu Korasaun de Jesus (SAKROJES), ne’e ho montante osan millaun rua resin, osan sira ne’e governu apoiu 70% no Arkidioseze Dili apoiu pursentu 30.

No More Posts Available.

No more pages to load.